သွက်ကျာ်ပဋိမာရုပ်မာရဝိဇယ ပ္ဍဲနေပျဳဒဝ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် ဒက်ပ္တန်ရှ်ေသှ်ေလဝ်ဂှ် ခရိုဝ်နဳဇၞော်ပ္ဍဲကၟိန်ဍုၚ်ဗၟာ (၁၀၁) တၠ ကဵုလဝ်ဒါန် (၁၆) ဗဳလဳယာန်ဒကေဝ်ရဂှ် ကံၚ်ဇြဳပၞာန်လလောၚ်တြးလဝ်ပရိုၚ် ပ္ဍဲဂိတုဂျောန် စၟတ်တ္ၚဲ (၂၉) ဂှ်ရ။
ဗ္ၜတ်ဏံဂှ် ကြဴနူလဗိုတ်ကျာလုပ်လဝ် ပ္ဍဲရခေၚ်တုဲ ဂွံမွဲတ္ၚဲဂှ် ဒှ်ဗၞတ်ဗ္ၜတ်ဂၠိုၚ်လ္တူနူ သြန်ဒုၚ်ဂွံလဝ်ဒါန်ဂှ်ဏီရ။ ဆေၚ်စပ်ကဵု လ္တူခရိုဝ်နဳတအ် ပါလုပ်ကဵုလဝ်ဒါန် ပ္ဍဲဒါန်က္ဍိုပ်သ္ကိုပ်ပၞာန်ဗီုဏံတုဲ ဆက်စၠောံသၟာန်လဝ်ကဵု ကျာ်ဇၞော်မေန်သုည (ဗုဒ္ဓတက္ကသိုလ်)ရ။
– ပ္ဍဲလ္တူ ကဵုဒၟံၚ်ဒါန် မဒါန်က္ဍိုပ်သ္ကိုပ်ပၞာန် က္ဍိုက်ဒၟံၚ်က္ဍိုပ်ဒပ်ပၞာန် ရပ်ဖျေံဒၟံၚ်ထံၚ် မၞိဟ်ဂၠိုၚ်ကဵုလ္ၚီ၊ ပြိုက်ဂစိုတ်ဒၟံၚ်ကောန်အရာပ် ဂၠိုၚ်ကဵုကၠံ၊ စံၚ်ပလီုဒၟံၚ် သ္ၚိဌာန်ဂၠိုၚ်ကဵုဠက် ကြဴနူဂိတုဖေဖဝ်ဝါရဳ သၞာံ ၂၀၂၁ တုဲဂှ် ဒဵုကဵုလၟုဟ်ဏံ ဒက်ပ္တန်ဒၟံၚ်ကျာ်ဂှ် ဗီုလဵုညာတ်ကေတ်ရော။ တုပ်ညံၚ် ကဵုဒၟံၚ်ဇြဟတ်ကဵုသမၠီု၊ စဝ်ဒၟံၚ်ဍာ်ကဵု တၞံဂျိဟာ။
ဒှ်ကိစ္စယုတ်သဝ်လောန်ရ။ တအ်ဏံဂှ် ဒှ်လၟေၚ်ဂၠံၚ်တရဴကျာ်လေဝ် ဟွံသေၚ်ပုဟ်။ ညိဓဝ်လေဝ် ဟွံကိတ်ညဳကဵု တဝှ်ဍောၚ်ဓဝ်ကျာ်ပုဟ်။ ဍေံဏံ မွဲလ္ပာ်ဂှ် လၟုဟ်တှ်ေ စံၚ်ပလီုလဝ် သ္ၚိဌာန်ညးဍုၚ်ကွာန် ထပှ်ဠက် ဒ္စာံဠက်ပြၚ်။ ပြိုက်ဂစိုတ်လဝ်ခမဳသၚ်တအ် (၅၀)ဇကု ပြၚ်အာယျ။ လၟုဟ်ဏံလေဝ် ကျာ်ဇၞော်၊ ခမဳသၚ် ဟွံဂွံဗၠးတိတ်နူထံၚ်ဍေံ နွံဒၟံၚ်ဏီ။ ညးဍုၚ်ကွာန်တအ်ဂှ်တှ်ေ ထပှ်ဠက်ပြၚ် ဒးဒုၚ်ရပ်လဝ်ရ။ ညးပါဲဘဲပၞာန်ဟီုတှ်ေလေဝ် ဂၠိုၚ်ကဵုကိုတ် နွံဒၟံၚ်ရ။
ညးဍုၚ်ကွာန်သီုဖအိုတ်ဂှ် စိုပ်ဒၟံၚ်ဒဒိုက်ဍာံဍာံ။ ဒးစံၚ်တူ။ ဒးလရိုဟ်ယာံဒၟံၚ်။ အခိၚ်အာစိုပ်ဒၟံၚ်ဒဒိုက်နာနာဂှ် ဒက်ကျာ်၊ သိုၚ်ဘာ အတိုၚ်တဝှ်ဍောၚ်ဓဝ် ကျာ်လေဝ်ဟွံသေၚ်ဂှ် ဇေတ်တ်တေံဂှ် သွက်ဂွံထ္ၜးစသက်က်ရ။ ကျာ်တြဲပိုဲ ဟီုတွံလဝ်ဂှ်တှ်ေ ကျာ်ဂမျိုၚ်ဟီုတွံလဝ် နွံဒၟံၚ် ဇွသမ္အုဲညံၚ်ကဵုအဲကျာ် ဇကုတအ်ဂ္ဇအ်ဒၟံၚ်တုဲ ယဝ်လျုၚ်ဒၟံၚ်တှ်ေ မုအဓိပ္ပါယ်ဟၟဲပုဟ်။ ဒ္ဂေတ်ဗက် တဝှ်ဍောၚ်ဓဝ် ကျာ်တွံလဝ် နတဲဟေၚ် ဒှ်လ္ၚောဝ်ကျာ်။ ဒှ်ပူဇဴကျာ်။ ဒှ်ညးတီကျာ်ရ။ လၟေၚ်ဂၠံၚ်တရဴကျာ်ဂှ် အတိုၚ်ဏံရ။ ပ္ဍဲမွဲလ္ပာ်ပၠန်ဂှ် စှ်ေစးကဵု တဝှ်ဍောၚ်ဓဝ်ကျာ်တုဲ ဗီုမိက်ဂွံဂစိုတ်ဂှ် ဂစိုတ် ဗီုမိက်ဂွံစံၚ်ပလီုဂှ် စံၚ်တုဲ ဒက်ပ္တန်ထ္ၜးကဵုကျာ်ဟီုဂှ် ဗီုဟီုနူကၠာဂှ်ရ ကၠောန်ထ္ၜးဆၜိုတ်ဗီုပြၚ်ဟေၚ်ရ။
လၟေၚ်ဂၠံၚ်တရဴ ကျာ်တြဲကဵုဇြဟတ်ဟွံသေၚ်ပုဟ်။ ဗီုဟီုလဝ်နူကၠာဏံဂှ် ခရိုဝ်နဳ ကဵုလဝ်ဒါန်ဂၠိုၚ်ကဵုဗဳလျာန်တအ်ဂှ်တှ်ေ ဆၜိုတ် ဒုၚ်ယၟုဓဝ်ရ။ ခရိုဝ်နဳဟီုဂှ် ပါ်တိတ်နူတၠအဝဵုပၞာန်တုဲ ကၠောန်ကမၠောန်ဂွံ ဟွံသေၚ်ပုဟ်။ ပံၚ်ကဵုဍေံတအ်ကိတ်မှ ဂွံကၠောန် ကမၠောန်ဂွံရ။ ပံၚ်ကဵုတၠအဝဵုပၞာန်တုဲတှ်ေ ဍေံတအ်(ခရိုဝ်နဳ)တအ်လေဝ် ထ္ၜးဟိုတ်ကဵုကျာ် ကၠောန်သ္ပဒၟံၚ် ညံၚ်တၠအဝဵုပၞာန် ဂွံရာန်လွဟ်နက် ညံၚ်ဂွံဒှ်အထံက်ဒလာဲတၠအဝဵုပၞာန် ကၠောန်လဝ်ရ။ အခိၚ်ညးဍုၚ်ကွာန်တအ် ဒှ်ဒဒိုက်ကၠောဝ်ဗျဵုဒၟံၚ်ဂှ် ဍဵုဍိုက်ပျဲပျာံ ပြိုက်ဂစိုတ်ဒၟံၚ် ညးဍုၚ်ကွာန်တုဲ ကၠောန်ထ္ၜးကဵု ဗီုပြၚ်ဒါကာကျာ်ဂှ် ဒှ်ဍိုက်ဓရိုက်ဒၟံၚ်ကျာ်။ လံက်မံၚ်ဂြိၚ် ပ္ဍဲမုက်ကျာ်။ လံက်ဒၟံၚ်ဂြိၚ် ပ္ဍဲမုက်ခမဳသၚ် နွံဒၟံၚ် ပိကိုတ်ပြၚ်ၚ်ဂှ်ရ၊ ဒဵုကဵုလၟုဟ်ဏံ ရပ်ဒပ်ဖျေံလဝ်ထံၚ် ကဵုခမဳသၚ်တအ်ရ။ ပ္ဍဲသၞာံ ၂၀၀၇ တေံလေဝ် ပြိုက်ဂစိုတ်လဝ် ခမဳသၚ် ဖ္ဍောတ်ဒၟံၚ်မေတ္တာသုတ်ၜိုဟ်ဟ်သြိုဟ်ဟ်တအ်ရ။ ဣဏံဂှ် ဍေံတအ်ကၠောန်ကၠုၚ်ဒၟံၚ် ခေတ်အဆက်က်ရ။
တၠအဝဵုပၞာန်ဂှ် ဃောနေဝေန်တေံလေဝ် ပ္တန်ထ္ၜးကဵု ကျာ်စေတဳမဟာဝိဇယရ၊ လက်ထက်တာန်ယှိုဲလေဝ် ပ္တန်ထ္ၜးလဝ်ကဵု ကျာ်ကျောက်တဝ်ဂျဳ။ ကျာ်ဇြဲဒဝ်တအ်။ ဣဏံဂှ် တၠအဝဵုပၞာန်တအ် ကမၠောန်ဍေံတအ်ကၠောန်လဝ်ဂှ် ဒုၚ်ဒၞာကဵုကျာ်တုဲ ဆၜိုတ် ကၟာတ်လဒဵု။ သ္ပထောံလဝ်ဒၞန်ဓဝ်ရ၊ ထပ်တုဲ က္ဍိုက်ဓရိုက်လဝ်ရ။ က္ဍိုက်ဓရိုက်ဗီုဏံ သီုတီဒၟံၚ်ဖိုဟ် အာကဵုဒၟံၚ်ဒါန် ဂၠိုၚ်ကဵုဗဳလျာန်တှ်ေ တုပ်ဒၟံၚ်ဖဍာ်ကဵုတၞံဂျိဇေတ်တ်ရ။ ကၠောန်ဒၟံၚ် ညံၚ်သမၠီု ဂွံဂစိုတ်မာန် သာတုဲဂွံဒှ်ဇြဟတ်ရ။ မၞိဟ်အာကဵုလဝ်ဒါန်တအ်ဂှ်လေဝ် ဒှ်ကောန်ဒုဟ်ဝၚ်မွဲပ္ၚံက်ရ။ စိုပ်မွဲအခိၚ်မ္ဂး ပ္တိုန်ရုၚ်သၞောဝ်ဓဝ်တုဲ ဒးကဵုဒုဟ်ဒဏ်ဏောၚ် ဟိုတ်နူမၞိဟ်တအ်ဏံ ကဵုဒၟံၚ်ဒါန်တုဲ ညးဍုၚ်ကွာန်ပိုဲ ဟွံထေက်ကဵုချိုတ်မွဲသာ် ဒးချိုတ်ဒၟံၚ်၊ ဒးဒုၚ်ပြိုက်ဂစိုတ်ဒၟံၚ် အရိုဟ်ဒဒှ်တ္ၚဲ ရတ်ကၟိန်ဍုၚ် အ္စာဂဥုဲတအ်၊ အ္စာၝောံတအ်၊ အေန်ဂျေန်နဳယာတအ် တအ်ဏံဂှ်ဒှ်ရတ်ကၟိန်ဍုၚ်ဏောၚ်၊ ဒၟာနူၝတအ်ဏံ ကၠောန်ကၠုၚ်ပရေၚ်ပျဲပျာဲပြိုက်ဂစိုတ်ဂှ်ရ တဲရပ်ဒၟံၚ်ကပေါတ်စမ်ၜတ် ကလၚ်၊ တဲရပ်ဒၟံၚ်တိဗု၊ ရတ်ကၟိန်ဍုၚ်တအ်ဂှ် ဒုၚ်ဖအိုတ်လမျီုသွက်ဍုၚ်၊ ကၠောန်ကၠုၚ်ကမၠောန် ပရေၚ်စဵုဒၞာညးသ္ကအ်ရ။ ဒုၚ်သၠးလဝ် လမျီုညးသ္ကအ်ရ။ ဣဏံဂှ်မုရောတှ်ေ ခရိုဝ်နဳကီု၊ ဒဳတဂူတအ်၊ ဆေကိန္ဒတအ် မဘသတအ် လကျာ်တအ်ဏံ ကဵုဒၟံၚ်ဇြဟတ်ကဵုသမၠီုဂှ်လေဝ် ဒှ်ညးတၠဒုဟ်ဒဏ်ဝၚ်ရ။ စဝ်ဆာဲဒၟံၚ်ဍာ် ကဵုတၞံဂျိရ။ တအ်ဏံဂှ် စိုပ်မွဲအခိၚ်မ္ဂး ဒးဒုၚ်စောဲဂဗုတ် ဒးဒုၚ်ကဵုဒုဟ်ဒဏ်ဏောၚ်။ မုဒှ်ရောတှ်ေ ပရေၚ်ဍေံတအဴဴကဵုဇြဟတ် ဖအဴကဵုလဝ်ဂှ် တ္ၚဲဏံ ချိုတ်ဟွံထေက်မွဲသာ် ဒးချိုၚ်ဒၟံၚ်။ဒးဒုၚ်ဂစိုတ်ဒၟံၚ်ဂှ်ဍေံတအ်လေဝ် ပါလုပ်ဒၟံၚ်ရ တၠဂုဏ်မိက်ဂွံဟီုရ။
-သၟိၚ်ယုတ်ပရေံ ဒက်ပ္တန်ကျာ်ဟီုဂှ် ဗီုခရိုဝ်နဳတအ် ကဵုဒါန်ဏံဂှ် ပ္ဍဲလက်ထက်ကျာ်တေံ ကေၚ်နွံကၠုၚ်ဒၟံၚ်ကီုဟာ။ ပ္ဍဲသုတ္တန်ကျာ်တွံလဝ် နွံဒၟံၚ်ကီုဟာ။
ဗီုကဵုတၠဂုဏ်ဟီုလဝ်ကၠာဂှ်ရ။ ကမၠောန်ဒက်ကျာ်ဂှ် ဍာံဍာံတေံတှ်ေ ပ္ဍဲလက်ထက်ကျာ်ပိုဲနွံဒၟံၚ်တေံလေဝ် ဟၟဲပုဟ်။ ဣဏံဂှ် ကျာ်ဟီုတွံလဝ် ပြာကတ်ဒၟံၚ် တုဲတုဲရ။ ကျာ်ဂမျိုၚ်ဂှ် ကၠုၚ်ဗီုဏံတုဲဂွံပူဇဴဒၟံၚ်ဟွံသေၚ်ပုဟ်။
ကျာ်ပဋိမာရုပ်တအ်ဟီုတှ်ေ အတိုၚ်တီဒၟံၚ်ဂှ်ရ သာဝါတ်ရ။ ကျာ်တြဲဂှ် ဒ္ဂေတ်လၟေတ်ရ ကလေၚ်မၚ်မွဲဇကု။ ကျာ်တြဲဂှ် ညံၚ်ဂွံဒ္ဂေတ်ဗက် နတဲရ ဟီုတွံလဝ်။ လၟေၚ်ဂၠံၚ်တရဴကျာ်ဟွံသေၚ်ပုဟ်။ ဍေံတအ်ပ္တန်ကျာ်သိုၚ်ဘာဂှ် ဒှ်ကၠောန်သ္ပဒၟံၚ်ကာဗာ ကမၠောန်ဍေံတအ် ဗီုမိက်ဂွံဂစိုတ် ဂစိုတ်ဒၟံၚ်။ ယဝ်ရံက်ကဵုပြကိုဟ်ကျာ်တှ်ေ ၝတအ်ဏံကၠောန်ဒၟံၚ်ဂှ် မွဲတၚ်လေဝ် ဟွံကိတ်ညဳပုဟ်။ ယဝ်ရံၚ်ကဵု သက်သဳသာဓက ပြကိုဟ်တအ်တှ်ေ ဒၞာဲလဵုလေဝ် ဟွံကိတ်ညဳပုဟ်။ တးပါဲထောံဒၠောံဗ္တောန်လၟေၚ်ဂၠံၚ်တရဴကျာ်တုဲ ဒှ်လၟေၚ်ဂၠံၚ်တရဴကွာ်ဒၟံၚ်ရဂှ် တၠဂုဏ်မိက်ဂွံဟီုဏာရ။
-ပၠံၚ်ၜးကေတ်အဝဵုကၟိန်ဍုၚ်ဟွံဗဗွဲဓဝ်တုဲ မၞိဟ်ကၠောန်သ္ပဒၟံၚ်ပွဒုစ္စရိုတ်၊ ပွဟွံဗဗွဲဓဝ်ဗွဲမဂၠိုၚ် ပ္တန်ဒၟံၚ်ကျာ်ဂှ်ရော ဂွံဒၟံၚ်ကုသဵုကီုဟာ။ ဗီုဂှ်ဟွံသေၚ်တှ်ေ ဇိုတ်ပလီုကဵု အကုသိုလ်ဍေံကၠောန်လဝ်ဂှ် မာန်ဏောၚ် ပတှ်ေကေတ်လဝ်ဗီုဏံဟာ ဟီုထ္ၜးကဵုညိကျာ်။
တဝှ်ဍောၚ်ဓဝ်ကျာ်တြဲဂှ် သောၚ်ဒၟံၚ်ရ။ တဝှ်ဍောၚ်ဓဝ်ကျာ်ပိုဲဂှ် ယဝ်ရမၚ်မွဲဒ္ဂေတ်ဗက်နတဲတှ်ေ ဂွံဒုၚ်စသိုၚ်ပိုန်ဟာန် ၜိုဟ်လလံ၊ ဟၟဲကဵုဒုဟ်ဏောၚ်။ အရာဒစဵုဒစးကဵု ဒၠောံဗ္တောန်ကျာ် ကျ်ာဟီုတွံလဝ် လ္ပဂစိုတ်၊ လ္ပကၠတ်၊ လ္ပပျဲပျာံဍဵုဍိုက်ညးဍုၚ်ကွာန်တအ်ဂှ် အာက္လိလောန်ဒၟံၚ်ဏောၚ်တှ်ေ ဣဏံဂှ် အာရပ်ဒၟံၚ် လ္ၚပၟတ်ရ။ ဍေံဂှ်စှ်ေဒၟံၚ်နရက်ယျ။ လက်ထက်ကျာ်တေံလေဝ် နွံဒၟံၚ်။ ကၠာဟွံချိုတ်ဏီ ဒးဒၟံၚ်နရက်တုဲ သၟာဂစိုတ်ကၠိက်ဂှ်ဟီုတှ်ေ ကၠာနူဟွံချိုတ်ဏီဂှ် ပၟတ်နရက်တိုန်ကၠုၚ်ဂဵုဒၟံၚ် ပ္ဍဲသ္ၚိညးတေံရ။ လၟုဟ်လေဝ် ယဝ်ရံၚ်မေန်အံၚ်လှာၚ်တှ်ေ ပ္ဍဲစိုတ်ဍေံ ပၟတ်နရက်ဂဵုသၠာန်ဒၟံၚ်ယျ။ ရံၚ်ကေတ်မုက်ဍေံဂှ် တီဒၟံၚ်ရ။ ဒၞာဲလဵုအာအာ ဒှ်ဒၟံၚ်ဓဝိၚ်ရ။ ဒးက္တူက္တာန်ဒၟံၚ်ရ။ ယဝ်ကလေၚ်ရံၚ်အာ ဘဝဂတပၠန်တှ်ေလေဝ် ဒးအာစိုပ်နရက်မဟာအဝိဇိရ။
ကျာ်တြဲဂှ်လေဝ် ဗီုမိက်ဂွံဂစိုတ်ဂှ်ဂစိုတ်တုဲတှ်ေ ဒက်ပ္တန်ကျာ် ဂြောပ်ဗ္ဒန်ထောံဂွံမံၚ်ဏောၚ်ဂှ် ဒၞာဲလဵုလေဝ် ဟီုတွံလဝ် ဟၟဲပုဟ်။ တၚ်ဏံဂှ် ညံၚ်ဂွံတီလဝ် ကၠးကၠးတၟးတၟးသီုညးဖအိုတ် ပၟိက်ဇၞော်ဒၟံၚ်။ ကမၠောန်မေန်အံၚ်လှာၚ်ကၠောန်ဒၟံၚ်တ္ၚဲဏံ ဟိုတ်နူဒှ်ဒၟံၚ်ဂၠံၚ်ဍာန်လ္ပာ်ပရေံဂှ်ရ ပ္ဍဲစိုတ်ဍေံလေဝ် ဒးကတူက္တာန်ဒၟံၚ် အရိုဟ်ဟ်တ္ၚဲ။ ဣဏံ ဒှ်လောကနရက်ရ။ ပြိုက်ဂစိုတ်လဝ်ခမဳသၚ်တအ်။ ဖျေံလဝ်ထံၚ်စာတ်၊ ပျဲပျာံဍဵုဍိုက်လဝ်၊ စံၚ်လဝ်ကဵုပၟတ် အေပၟတ်တအ်ဂှ် က္လေၚ်စိုပ်ဂွံ ပ္ဍဲစိုတ်ဍေံဂှ်တုဲ ကမၠောန်ဗၠေတ်မှာတအ်ဏံ ကၠောန်ဒးအာလဝ်ယျဂးတုဲ အရိုဟ်ဟ်တ္ၚဲ ဒးကတူဒၟံၚ် ပၟတ်နရက်ရ။
ကမၠောန်မေန်အံၚ်လှာၚ်ကၠောန်ဒၟံၚ်ဂှ် ဒှ်ကမၠောန်နဲလဵုလေဝ် ဂြောပ်ဗ္ဒန်ထောံ ဂွံဟွံသေၚ်ရ။ လၟေၚ်ဂၠံၚ်တရဴကျာ်ဟီုဂှ် ယဝ်ရတီဗၠေတ်မ္ဂး ဒးသၠးထောံလွာဲဂှ်ဏောၚ်။ သၠးထောံတုဲ ဒးကွာ်ဗက် ဂၠံၚ်တရဴဍာံဂှ်ဏောၚ်။ လၟုဟ်ဂှ် ဍေံတအ် သၠးထောံဟွံသေၚ်တုဲ ဆက်ကၠောန်ဗၠေတ်မှာဒၟံၚ်တုဲ ဃောကၠောန်ဗၠေတ်ဒၟံၚ်ဂှ် ဟွံသၠးထောံဓဝ်ဗၠေတ်တုဲ ဒက်ပ္တန်ထ္ၜးကဵုကျာ်ဂှ် လးလး၊ လးလးလေဝ် ဗၠးတိတ်နူ ဒုဟ်ဟွံသေၚ်ပုဟ်။ ဖိုလ်တုပ်သၟတ်ဗီုဟီုနူကၠာဂှ် အတိုၚ်ဟီုလဝ် ဒးဒှ်မွဲဗီုဓဝ်ဏောၚ်ဂှ် အာရပ်ဒးပၟတ်။ ယဝ်ရဆၚ်စှ်ေပ္ဍဲကတိုၚ်ပၟတ်တှ်ေ ကတူဏောၚ်ဟီုဂှ် ဍေံဂှ်ကဵုညးဍုၚ်ကတူပၟတ်။ ကၠောန်လဝ်ညံၚ်ညးဍုၚ်ကွာန်တအ်ဂွံကတူ လၟုဟ်ဂှ် ဒးဒုၚ်ဒၟံၚ်ကတဴဒၟံၚ်ယျ။ ကၠာဟွံဂွံချိုတ်ဏီ ဒးစှ်ေဒၟံၚ်နရက်ယျ။ ဍေံဟွံဂီုကၠီုရပုဟ်။ စိုတ်တေံဒးကတူဒၟံၚ်တုဲ ပ္ဍဲဘဂတဏံလေဝ် ဒးစှ်ေနရက်ဏောၚ် ဒးဒှ်ဂတာနရက်ဏောၚ်ဂှ် မိက်ဂွံဟီုသှ်ကဵုဏာရ။