ကောန်ဒပ်ဒမၠုက်လ္တူဍုၚ်လ္ဂုၚ်တံ ဟွံဂံၚ်ဗ္တိုက်ဒပ်ပၞာန်တုဲ ဗ္တိုက်ဒၟံၚ် အရာပ်မၞိဟ်ဒၟံၚ်တံရောၚ်ဂှ် ရဲထံက်ဂလာန်ဒပ်ပၞာန်တံ တြးဝါဒ

ဒး၊ ဗၠေတ်

မ္ၚဵုရအဴ။ ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရ။

တ္ၚဲဏံ ပရူပရာ မပါလုပ် ပ္ဍဲဗီုဓာတ် အကံက်ပ္တောံကံၚ်ဇြဳပၞာန်တံ မတြးဒၟံၚ် “ကောန်ဒပ်ဒမၠုက်လ္တူဍုၚ်လ္ဂုၚ်တံ ဟွံဂံၚ်ဗ္တိုက်ဒပ်ပၞာန်တံတုဲ ပွန်ပၞာန်ဟွံသေၚ် အပ္ဍဲအရာပ်မၞိဟ်ဒၟံၚ်တံဂှ် ပ္ဍဲဂိတုဂျူလာၚ် ၄ အခိၚ်ဗ္တံတေံဂှ် ခတိုဟ်လဝ်ဗမ်” ဂှ် စၟဳစၟတ်ကဵုအာရောၚ် မဒှ်ရ။

ပရူပရာဏံဂှ် ပ္ဍဲဂိတုဂျူလာၚ် (၄) တေံ နူကဵုအကံက်ထလဳဂရာမ် KYAW SWAR, Han Nyein Oo တံ တြးဒၟံၚ်ဝါဒ လ္တူဇာဇၞိက်ပရေၚ်မၞိဟ်တံရ။ စပ်ကဵုပရူူပရာ မပါလုပ် ပ္ဍဲပသ်ထ် ကေုာံ ဗီုဓာတ် အကံက်ပ္တောံရဲထံက်ဂလာန်ဒပ်ပၞာန်တံ မတြးဒၟံၚ်ဂှ်တုဲ နူကဵုသြၚ်လောန်တိုၚ်(မ်) စၟဳစၟတ်စမ်ရံၚ်ဂှ် ဒဒှ်ရဒှ်ဒၟံၚ်ပရိုၚ်ဗၠေတ် တြးဝါဒဂှ် စၟဳတ်ဂွံဆဵုကေတ်ရ။

လၟေၚ်ဒဒှ်ဍာံဂှ် ကောန်ဂကောံဒပ်ဒမၠုက် လ္တူဍုၚ်လ္ဂုၚ်တံ ပ္ဍဲသၞာံ ၂၀၂၃ ဂိတုဂျူလာၚ် ၄ အခိၚ်ဇိုၚ်သဝ်တ္ၚဲဂှ် လလောၚ်ပ္တိတ်လဝ်ပရိုၚ် ဒဒှ်ရဖံက်ဗ္တိုဟ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် လ္တူဍုၚ်လ္ဂုၚ်ဂှ် ၂ ဗ္ဒိုပ်၊ ဌာနက္ဍိုက်ပ် ကဵုအထံက်ရီုကံၚ်ဇြဳပၞာန်ဂှ် ၃ ၊ သၞေဟ်ကၚ်စၟဳတ်ကံၚ်ဇြဳပၞာန်ဂှ် ၁ ဂှ် စၟဳတ်ဂွံဆဵုကေတ်ရ။

ကၠာဟွံဂွံကၠောန် ပရေၚ်ပြုပြေၚ်ပၞာန်လ္တူဍုၚ်လ္ဂုၚ်ဂှ်လေဝ် UG လ္ဂုၚ်တံသီုဖအိုတ် ကဵုလဝ်သမ္တီ ကုညးဍုၚ်ကွာန်တံ သွက်ဂွံပါဲကဵု ဒၞါဲမကြပ်နူကဵု ဗ္ဒိုပ်ဒပ်ကံၚ်ဇြဳပၞာန်တံဂှ် စၟဳတ်ဂွံဆဵုကေတ်ရ။

ဂိတုဂျူလာၚ် ၄ အခိၚ်ဗ္တံ နူ ၈ နာဍဳ ကဵု ၁၂ နာဍဳ ဂှ် ဒဒှ်ရဗ္တိုက်လဝ် အရာပ် (၃) ပွိုၚ်ဍုၚ်သ္ကုတ်ဗၟံက်လှိုၚ်သာယာဂှ်ကီု၊ ဂၠံၚ်လ္ဂုၚ်−ညံၚ်တုၚ်၊ ဗ္ဒိုပ်ဗၠာဲသၟိၚ်ၝောံဍုၚ် မၞုံဗ္ဒါဲဒၞါဲကွဳစက်ဒေါအ် စၟတ် (၅) ၊ ဗ္ဒိုပ်စၟဳတ်ကံၚ်ဇြဳပၞာန် မၞုံလ္တူဂၠံၚ်ဇၞော်တပေန်ယှိုဲထဳ အကြာအရာပ်အံၚ်ဆာန်တာကဵု ကွာန်သ္ကိုပ်ဗိုလ် ပွိုၚ်ဍုၚ်တာန်လျေန်ဂှ်ကဵု ရုၚ်ဌာနက္ဍိုက်ပ်ပရေၚ်ဆက်ဆောံ ကေုာံ လလောၚ်ပရိုၚ် မၞုံလ္တူဂၠံၚ်ယှိုဲဂုၚ်တိုၚ်ဂှ်ကီု၊ ရုၚ်ဌာနက္ဍိုက်ပ်ကောပ်ကာဲပရေၚ်မၞိဟ်လုပ် မၞုံလ္တူဂၠံၚ်ဝၚ်္ဂဘာ အရာပ် (၁) ဗိုလ်ချိုဝ်ဂှ်ကီု၊ ရုၚ်သၞောဝ်ဓဝ်ပွိုၚ်ဍုၚ် မၞုံဂၠံၚ်သစ္စာ၊ အရာပ် (၁၀) ပွိုၚ်ဍုၚ်ဥက္ကလာပသၠုၚ်ကျာတံဂှ် ဂကောံ UG လ္တူဍုၚ် Freeland Attack Force (FLA) တံ လလောၚ်ပ္တိတ်လဝ်ပရိုၚ်ဂှ် စၟဳတ်ဂွံဆဵုကေတ်ရ။

နူကဵု Anonymous Fighters Force-AFF သ္ကိုပ်သ္ကတုဲ Freeland Attack Force-FLA, Phoenix Urban Guerrilla Force, Emerald Girls Army-EGA, Rangoon Urban Force တံ ပံၚ်တောဲဖံက်ဗ္တိုဟ်ဗ္တိုက်လဝ်တုဲ ဗွဲမဗၠးဘဲ ဆုတ်ကလေၚ်မာန်လဝ်ရောၚ် လလောၚ်ပ္တိတ်လဝ်ပရိုၚ်ဂှ် ဂွံဆဵုကေတ်ရ။

ပ္ဍဲကဵုပရေၚ်ပြုပြေၚ်ပၞာန်ဏံဂှ် ကောန်ဒပ်ကံၚ်ဇြဳပၞာန်လ္ၚဵု ဇီုကပိုက်လဝ်နွံတုဲ ပ္ဍဲကဵုမေတ်ယှေန်ပွိုၚ်ဍုၚ်တာန်လျေန် ကေုာံ မေတ်ယှေန်ဗ္ဒိုပ်ဗၠာဲသၟိၚ်သ္ကုတ်ဗၟံက် ပွိုၚ်ဍုၚ်လှိုၚ်သာယာတံဂှ် ကောန်ဒပ်ကံၚ်ဇြဳပၞာန် (၃) တၠဟွံအောန် ဇီုကပိုက်လဝ်နွံဂှ်လေဝ် လလောၚ်ပ္တိတ်လဝ်ပရိုၚ်ဂှ် ဂွံဆဵုကေတ်ရ။

ဂကောံ Freeland Attack Force လလောၚ်ပ္တိတ်လဝ်ပရိုၚ်ဂှ်

https://shorturl.at/IW257

ဌာန်ပရိုၚ် The Irrawaddy – Burmese Edition ထ္မံက်ထ္ၜးလဝ်ဂှ်

https://shorturl.at/derF2

ဌာန်ပရိုၚ် Myanmar now ထ္မံက်ထ္ၜးလဝ်ဂှ်

https://shorturl.at/bzCT1

ဟိုတ်နူတၚ်နၚ်တံဏံတုဲ ပရူပရာ မပါလုပ် ပ္ဍဲဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “ကောန်ဒပ်ဒမၠုက်လ္တူဍုၚ်လ္ဂုၚ်တံ ဟွံဂံၚ်ဗ္တိုက်ဒပ်ပၞာန်တံတုဲ ပွန်ပၞာန်ဟွံသေၚ် အပ္ဍဲအရာပ်မၞိဟ်ဒၟံၚ်တံဂှ် ပ္ဍဲဂိတုဂျူလာၚ် ၄ အခိၚ်ဗ္တံတေံဂှ် ခတိုဟ်လဝ်ဗမ်” သာ်ဝွံ မတြးဒၟံၚ်ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။

သြၚ်လောန်တိုၚ်(မ်)