ညးလုပ်ဂကောံကံၚ်ဇြဳပၞာန် လ္ပာ်ညးအရာပ်တအ်ဂှ် သ္ပတံနူ ဂိတုသေပ်တေမ်ဗာ ဒုတိယသတ္တာဟတေံတုဲ စဵုကဵုတ္ၚဲဏံ အာကၠုၚ်ဒၟံၚ် တရဴပရေၚ်စန္ဒက် ပ္ဍဲတွဵုရးကောန်ဍုၚ်အရၚ် အကြာညးဒေသတအ် အရိုဟ်ဒဒှ်တ္ၚဲရ။ ကောန်ဂကောံကံၚ်ဇြဳပၞာန်တအ် ဆဵုဂဗကဵု ညးယိုက်ဝန် မၞုံပ္ဍဲပွိုၚ်ဍုၚ် ၇ ပွိုၚ်ဍုၚ်၊ ညးဇၞော်ကွာန်အရာပ်၊ တၠကမၠောန်ပရေၚ်ပိုန်ဒြပ်၊ ဂကောံပရေၚ်မၞိဟ်တအ်၊ ညးဒေသ ကောန်ညးဍုၚ်ကွာန်လ္ၚဵုတအ်တုဲ စန္ဒက်ဒၟံၚ် ညံၚ်ဂွံပါလုပ် ပ္ဍဲပရေၚ်အုပ်ဓုပ်သၞောဝ်ဓဝ်၊ ပရေၚ်သ္ဂောံက္လိဂွံ ဓဝ်ၜိုဟ်လလံကေုာံ ပ္ဍဲလၟေၚ်ကမၠောန် သွက်ဂွံကၠောန်ပေါဲရုဲမာဲမာန်ဂှ် စန္ဒက်ဒၟံၚ်ရ။
စပ်ကဵုအကာဲအရာကောန် ကောန်ဂကောံကံၚ်ဇြဳပၞာန်တအ် ဗက်စန္ဒက်ဒၟံၚ် ပ္ဍဲတွဵုရးကောန်ဍုၚ်အရၚ်ကီု၊ ဖိုလ်ဍေံဗီုပြၚ်လဵု နွံကၠုၚ်မာန်ကီု၊ ပြဒ္ဒညာပရေၚ်ဍုၚ်ကွာန် ဒှ်ဒၟံၚ်လၟုဟ်ဏံတုဲ ဆက်စၠောံသၟာန်လဝ်ကဵု သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ရ။
၁။ ကၠာအိုတ်ဏံ ကံၚ်ဇြဳ လ္ပာ်ညးအရာပ်ကံၚ်ဇြဳပၞာန်တအ် အကြာမွဲၜါတ္ၚဲဏံ လ္တူဗက်စန္ဒက်ဒၟံၚ် ပ္ဍဲတွဵုရးကောန်ဍုၚ်အရၚ်တအ်ဂှ် ဗီုလဵုညာတ်ကေတ်ရော။ လ္တူဏံ သ္ၚဳဂၠိပ်ထ္ၜးကဵုညိ။
ဍေံတအ်ဂါံကၠုၚ်လဂါံဇိုၚ်ဗီုဏံဂှ်တှ်ေ အဓိကဂှ် ဒှ်ဗီုပြၚ်ထပ်တုဲကလေၚ်စန္ဒက်ညးဍုၚ်ကွာန်တအ်ရ။ ပ္ဍဲကဵုဒေသတအ်ဂှ်လေဝ်ပရေၚ်ညိၚ်ဝတ်၊ ပရေၚ်အုပ်ဓုပ်ဟၟဲရပုဟ်လေဝ်။ အဓိက်ဂှ်ဒှ်ဒၟံၚ်ပေါဲဗတိုက်ရ။ ၜိုန်ရပေါဲဗတိုက်ဟွံဒှ်လေဝ် နူကဵုကံၚ်ဇြဳပၞာန်တအ် ရပ်ကေတ်ဒၟံၚ်၊ စၟဳစၟတ်ဒၟံၚ်၊ ပြိုက်ဂစိုတ်ဒၟံၚ်၊ ဂြာတ်ထောံဖျေံဗုမ်၊ ပန်ဖျေံနၚ်နူကဵုခြာသ္ၚောဲသ္ၚောဲတအ် ဒှ်ကာလ ဆက်ဒၟံၚ်ဒၟံၚ်ဗီုပြၚ်ဏံရ။
ပ္ဍဲကဵုသ္ဇိုၚ်သၟဝ်တေံဂှ် ထ္ၜးဟိုတ်ကဵုက္ဍိုပ်လိက်ဗီုပြၚ်ဏံတုဲ စန္ဒက်ဒၟံၚ်ညးဍုၚ်ကွာန်တအ်ဟိုဂှ် ဒၞာဲဂိဂှ်တၞဟ် ဂဥုဲဂှ်တၞဟ် ဒှ်ဒၟံၚ်ဗီုဏံရ။ အခေါၚ်ကောန်ဍုၚ်အရၚ်တအ်ဒးဂွံ၊ အခေါၚ်အရာ၊ ပရေၚ်ဒဳမဝ်ကရေဇြဳတအ်လေဝ်၊ ယဝ်ပ္တိတ်ဇြဟတ်သွက်ဂွံကဵုအရာတအ်ဏံ ဟွံသေၚ်မွဲသာ် ညံၚ်ညးဍုၚ်ကွာန်တအ်ဂွံထံက်ဂလာန်ဂှ် ပ္တိတ်ဒၟံၚ်ဇြဟတ်ဂှ် အခိၚ်လေဝ်လအ်လဒၟံၚ်ယျ။ လဇုဲအာယျ။ နူကဵုစတမ်တေံ နူကဵုကၠာဟွံဒှ်ပေါဲဗတိုက်တေံ ပ္ဍဲကဵုဒေသကောန်ဍုၚ်အရၚ်တအ်ဂှ် ပရေၚ်ဖောအ်ဗြေဝ်တဴတက်ဗီုဏံ သ္ပတံနူကဵုပရေၚ်ပညာတအ်ဒှ်တအ် သီုကဵုပရေၚ်တၞဟ်ခြာနူကဵုၝောံဍုၚ်တအ်ဟၟဲမွဲသာ် ယဝ်ကဵုမာန်တှ်ေလေဝ်။ သာတုဲခိုဟ်ရ။ အခိၚ်လၟုဟ်မှဂွံကၠောန်ဏောၚ်တှ်ေ လဇုဲအာယျ။
၂။ ပရေၚ်ကောန်ဂကောံကံၚ်ဇြဳပၞာန်တအ် ဗက်ဂၠာဲစှ်ေစန္ဒက်ဒၟံၚ် ပ္ဍဲတွဵုရးကောန်ဍုၚ်အရၚ်တအ်ဂှ် ဗီုပြၚ်လဵု ဖိုလ်ဍေံနွံကၠုၚ်မာန်ရော။
ပြဒ္ဒညာပရေၚ်ဍုၚ်ကွာန်ဂှ် အခိၚ်သောၚ်ကလးဒၟံၚ် နကဵုပရေၚ်ပၞာန် ပ္ဍဲဒေသဏံ ပရေၚ်ညိၚ်ဝတ်ၜိုဟ်လလံ၊ ပရေၚ်ဖောအ်ဗြေဝ်တဴတက် က္ဍိုပ်လိက်ဍောတ်တ် ဗီုပြၚ်တအ်ဂှ်လေဝ်၊ တအ်ဏံဂှ် ဟွံစိုပ်တရဴပုဟ်။ သ္ၚိဒေါံကၟိုၚ်ဒၟံၚ် သီုကၟဳမွဲဂှ် ဒှ်ညံၚ်ပ္တိတ်ဒၟံၚ်ဇြဟတ် ဂွံကယာပ္တိတ်ဒေၚ်ကီုရ။ အဓိကဂှ် ဒှ်ကိစ္စဒးသောၚ်ကလးပရေၚ်ဍုၚ်ကွာန်ရ။ ဗွဲအစောံပရေၚ်ဍုၚ်ကွာန်ဂှ် ပ္ဍဲကဵုဒေသကကောန်ဍုၚ်အရၚ်တအ်ဂှ် အခေါၚ်အရာကောန်ဍုၚ်အရၚ်တအ် ဒးဆောံလေၚ်ဒၟံၚ်၊ ဟွံတုပ်သၟဟ်တအ်၊ ၝောံဍုၚ်ကဵု တွဵုရးပရေၚ်တၞဟ်ခြာဒၟံၚ် မပ္တံဗီုတအ်ဏံ ကောန်ဍုၚ်အရၚ်တအ်ဂှ် အခေါၚ်အဝဵုပိုၚ်ပြဳဇကုဇကု အခေါၚ်အရာအုပ်ဓုပ်ဒေသဇကု၊ ပ္ဍဲကာလအာတ်မိက်ဒၟံၚ်ဖေတ်ဒရေဝ်ဂှ် ကၠောန်ကဵုမာန်မှ ပေါဲပၞာန်တအ် ဂွံက္လေၚ်ညိၚ်ဝတ်ၜိုဟ်လလံကၠုၚ်မာန်ရ။ အရာဏံဂှ် သောၚ်ကလးကဵုဟွံမာန်တုဲ ပရေၚ်ဍုၚ်ကွာန်ဂှ် သောၚ်ကလးဒၟံၚ်ကဵုပရေၚ်ပၞာန်တုဲ မွဲလ္ပာ်ဂှ်လေဝ် အာသၠေံသၠန်ဒၟံၚ်ညးဍုၚ်ကွာန်တအ် နကဵုကမၠောန်ပရေၚ်ဖောအ်ဗြေဝ်၊ ကမၠောန်ပရေၚ်ပိုန်ဒြပ်၊ လၟေၚ်ကမၠောန်ပရေၚ်ပညာရ။ ဒှ်ဒၟံၚ်ဗီုပြၚ်ဏံရ။
၃။ အလန်လကြဴအိုတ်ဏံ စပ်ကဵုပြဒ္ဒညာပရေၚ်ဍုၚ်ကွာန် ဒှ်ဒၟံၚ်လၟုဟ်ဏံတုဲ မုမိက်ဂွံထပ်ဟီုဗပေၚ်နွံရော။
ဂကောံရပ်လွဟ်ကောန်ဍုၚ်အရၚ်တအ်ဂှ် လ္တူနူကဵုမိက်ဒၟံၚ်အခိၚ်ကၠာတေံ ညးတအ်တီကၠိုဟ်ကၠုၚ် အခေါၚ်အရာညးတအ်ဒးဂွံတုဲ။ ပ္တိတ်တံရိုဟ်လမျီုခန္ဓ၊ ဘဝ သွက်ကောန်ဂကူဇကုသီုဖအိုတ်တုဲ အခိၚ်ကၠောန်ကၠုၚ်ပၠန်ဂတးဏံဂှ် ဆၜိုတ် ပရေၚ်ဖောအ်ဗြေဝ်တဴတက် ညိညဓဝ်တှ်ေ ဂြောပ်ဗ္ဒန်ထောံဟွံမာန်ရပုဟ်။ မိက်ဂွံဟီုဂှ်တှ်ေ နွံဒၟံၚ်ပၟိက်ကဵု အခေါၚ်အရာဖေတ်ဒရေဝ်ရ။ နွံဒၟံၚ်ပၟိက်ကဵု အခေါၚ်အရာဒဳမဝ်ကရေဇြဳရ။ ညံၚ်ပရေၚ်သီအဝဵုဟွံဂွံဒှ်ဂှ် ဒပ်ပၞာန် ဒးနုက်တိတ် နူလောကပရေၚ်ဍုၚ်ကွာန်ဏောၚ်။ ဒးသောၚ်ကလးကဵု က္ဍိုပ်လိက်ဇၞော်ဇၞော်တအ်ဂှ်ဏောၚ်။ သီုကဵုဟွံသောၚ်တအ်ဏံတုဲ သၠေံသၠန်၊ စန္ဒက်ဒၟံၚ်ညးဍုၚ်ကွာန် မွဲလ္ပ်ာဓဝ် စိုပ်တရဴမာန်ဟွံသေၚ်ပုဟ်။ ဗီုဏံရ အဲမိက်ဂွံသ္ၚဳဂၠိပ်ရ။