ဗော်လူဘောၚ်တေတ်ဒဳမဝ်ကရေတ်တေတ် (DPNS) မဒှ်ဗော်ပရေၚ်ဍုၚ်ကွာန်ဝှ်ကြံၚ် မွဲဗော်ဂှ် ပ္ဍဲကဵုဂိတုအံက်တဝ်ဗာ စၟတ်တ္ၚဲ ၁၄ တုဲကၠုၚ်တေံ တ္ၚဲဒက်ပ္တန်ဗော် ပေၚ်ကၠုၚ်မရနုက်ကဵု ၃၅ သၞာံရ။
ဗော်လူဘောၚ်တေတ်ဒဳမဝ်ကရေတ်တေတ် (DPNS)ဂှ် ပ္ဍဲမွဲပွိုၚ်ဒက်ပ္တန်ကၠုၚ်ဗော် ပေၚ် ၃၅ သၞာံဂှ် ဒးဆဵုဂဗကၠုၚ်လဝ်ကဵု ပရေၚ်ဒးရုပ်ပလီုဗော် စဵုကဵု (၂) ဝါပေၚ်ၚ်ရ။ ဆ္ဂး ဗော်လူဘောၚ်တေတ်ဒဳမဝ်ကရေတ်တေတ် (DPNS)ဂှ် လုပ်ဒၟံၚ်ပေါဲဗတိုက်ကဵု ဂကောံဒပ်ပၞာန် သွက်ပရေၚ်ဓဝ်ဍာံ မွဲကရောံကဵုညးဍုၚ်ကွာန်တအ် ပ္ဍဲပၠန်ဂတးက္ညၚ်ရ။
ဟိုတ်ဂှ်ရ စပ်ကဵုလၟေၚ်ကမၠောန်အဓာန်ဂတ ဗော်လူဘောၚ်တေတ်ဒဳမဝ်ကရေတ်တေတ် (DPNS)၊ အခက်ခုဲဒးဆေၚ်ကၠုၚ်လဝ်မုက် တအ်တုဲ ဆက်စၠောံသၟာန်လဝ်ကဵု ဒဝ်နှေန်နှေန်မွှေ ဖက်ဆောညးအုပ်ကာ ဗော်လူဘောၚ်တေတ်ဒဳမဝ်ကရေတ်တေတ် (DPNS)ရ။
သြၚ်လောန်တိုၚ်မ် – ကၠာအိုတ်ဏံ အခိၚ် ဗော်လူဘောၚ်တေတ်ဒဳမဝ်ကရေတ်တေတ် ပေၚ်အာ ၃၅ သၞာံဏံ တၚ်ရန်တၟံ နူကဵုအခိၚ်စဒက်ပ္တန်ကၠုၚ်လဝ်တေံ ၜိုတ်ဂလိုၚ်လဵု ဓမံက်လဝ်ရုပ်ရဴမာန်ရော။ ဟီုလဴထ္ၜးကဵုညိ။
ဒဝ်နှေန်နှေန်မွှေ – ပိုဲဒက်ပ္တန်ကၠုၚ်လဝ်ဗော်ဂှ်တှ်ေ ပ္ဍဲဂိတုအံက်တဝ်ဗာ စၟတ်တ္ၚဲ ၁၄ သၞာံဏံ ပေၚ်ကၠုၚ် မရနုက်ကဵု ၃၅ သၞာံယျ။ ပ္ဍဲပွိုၚ်မွဲကာလ ၃၅ သၞာံဏံ ဗော်ပိုဲဂှ် ပံၚ်တောဲကဵု ကောန်ဂကူစုၚ်တုဲ သွက်ဂွံပၠန်ဂတးကဵု ဂကောံပၞာန် သၞညးဍုၚ်ကွာန်တအ် သီုဖအိုတ် ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်သ္ကုတ်အာဂှ် ပိုဲပ္တိတ်ကၠုၚ်လဝ်ဇြဟတ်ရ။ ဟိုတ်နူပ္တိတ်လဝ်ဇြဟတ် သွက်ဂွံပၠန်ဂတးဂှ်ရ ဒးဆဵုဂဗကၠုၚ်လဝ်ကဵု ပရေၚ်ဍဵုဍိုက်တၠအဝဵုပၞာန်ဗွဲမဂၠိုၚ်ရ။ ပ္ဍဲမွဲအယုက် ပွိုၚ် ၃၅ သၞာံဏံဂှ် ဗော်ဂှ် နူကဵုဒဒှ်ဗော်ပရေၚ်ဍုၚ်ကွာန် လုပ်ကဵုသၞောဝ်ဂှ် ဒးဒုၚ်ပလီုလဝ် သီုအလန်ဏံတှ်ေ ဒးဆဵုဂဗလဝ် ၜါဝါပေၚ်ၚ်ရ။ ရပ်ဒက်ဖျေံထံၚ် သ္ဂံၚ်ဗော်တအ်၊ က္ဍိုပ်သ္ကိုပ်တအ်ကီု၊ ပျဲပျာံဍဵုဍိုက်ကီု၊ အရာတအ်ဏံလေဝ် ပိုဲဂွံဆဵုဂဗလဝ်ဗွဲမဂၠိုၚ်ရ။ သီုဒးဆဵုဂဗကဵုအရာတအ်ဏံတုဲ ပိုဲဆက်ကၠောန်ဒၟံၚ် ပရေၚ်ဍုၚ်ကွာန်ရ။ ပရေၚ်ဆဵုဂဗ၊ ခန်လ္ၚတ် စပ်ကဵုဂကောံပၞာန်တုဲ ဂွံလဝ်တၟာဂလိုၚ်ရ။ ကိစ္စလဵု ဒးဆေၚ်မုက်ကဵုဒှ်။ ပိုဲဂှ်နူကဵုစဒက်ပ္တန်ဗော်တေံ ရမျှာၚ်ကြဵုဇာပိုဲ ဂိုၚ်ရပ်လဝ်နွံဒၟံၚ်ရ။ ဒှ်ရမျှာၚ်ကြဵုဇာဂှ် ညးဍုၚ်ကွာန်ဟေၚ် မိ၊ ညးဍုၚ်ကွာန်ဟေၚ် မရ။ တၚ်ရမျှာၚ်ကြဵုဇာဏံ စဵုအခိၚ်လၟုဟ် ဂိုၚ်ရပ်ဒၟံၚ်ဖိုဟ်ရ။ အာဂတနူဏံလေဝ် သွက်ညးဍုၚ်ကွာန်တအ်တှ်ေ ဆက်တုဲ ဂိုၚ်ရပ်အာပၠန်ဏောၚ်ဂှ် မိက်ဂွံဟီုဏာရ။
ပိုဲတအ်ဂှ် မွဲဒမြိပ် နူကဵုကောဒေံပိုဲအခိၚ်ကၠာတေံ စဵုအခိၚ်လၟုဟ် ရေၚ်တၠုၚ်ကၠုၚ်ဒၟံၚ် ဗီုဟီုလဝ်နူကၠာဏံ ကိစ္စသွက်ပရေၚ်ဂွံပလီုပလာ် သၞောတ်တၠအဝဵုပၞာန်ဂှ် ပိုဲကၠောန်ကၠုၚ်လဝ် စိုပ်ဒၟံၚ်တရဴတၟာဂလိုၚ်ရဂှ် ဟီုစမာန်ရ။ ဒးကေတ်အခိၚ်ကာလသၞာံလေဝ် ဒးကေတ်လဝ်နွံမာန်ရ။ ဆ္ဂး တော်ရံၚ်ကဵုအခိၚ်ကၠာတေံတှ်ေ ပၠန်ဂတးဇၞော်ဏံ ပိုဲသီုညးဖအိုတ်ဂှ် ညံၚ်ဂွံစိုပ်ဂတတေံ သာတုဲ ညံၚ်ဂွံကြပ်ကၠုၚ်ဂှ် အကာဲအရာဒးဓရိုဟ်ပလံၚ်ဗစိုပ် ဒၟာနူဒှ်ဒၟံၚ်ဂှ်ရ တၚ်ရန်တၟံပရေၚ်ပၠန်ဂတး ကြပ်ကၠုၚ်ဒၟံၚ်ရ။ ဣဏံဂှ် ဆက်ဂိုၚ်ရပ်လဝ်တုဲ ပိုဲဆက်ပၠန်ဂတးအာဏောၚ်။ ကုတ်ဗပိုတ်အာ ရိုဟ်ကၞက်ဏောၚ် မိက်ဂွံဟီုရ။
သြၚ်လောန်တိုၚ်မ် – နကဵုဗော်လူဘောၚ်တေတ်ဒဳမဝ်ကရေတ်တေတ် မုသွက်ဂွံဆက်ကၠောန်ရေၚ်တၠုၚ်အာ ရန်လဝ် နွံရော။
ဒဝ်နှေန်နှေန်မွှေ – တၚ်ရန်တၟံပိုဲဂှ်တှ်ေ သွက်ကၟိန်ဍုၚ်ပိုဲ ပရေၚ်တဴတက်ဒှ်တိုန် ဗွဲမၜိုဟ်သြိုဟ် ဂွံဒှ်တိုန်ကၠုၚ်ဂှ် ရန်လဝ်ရ။ ၜိုန်ဂှ်ကီုလေဝ် ပ္ဍဲအကာဲအရာဒးတတ်ထပါ်ဒၟံၚ် နတဲလၟုဟ်ဂှ်တှ်ေ ဂကောံပၞာန်ဂှ် ဗီုပြၚ်ပၠန်ဂတး ပိုဲကၠောန်ရေၚ်တၠုၚ်ဒၟံၚ်ဂှ် နူလ္ပာ် ဍေံကဵုလဝ်ဇြဟတ်ဓရိုဟ်ဂှ်ရ လ္ပာ်ပိုဲ ဒေါံဟွံဂွံဒးကၠောန်ရေၚ်တၠုၚ်လဝ် နွံရ။ ကၠာတေံလေဝ် ဗော်ဂှ် နူကဵုဒဒှ်ဗော်လုပ်ကဵုသၞောဝ် ပလီုပလာ်သီထောံတုဲ ရပ်ဒက်ဖျေံထံၚ် သ္ဂံၚ်ပိုဲတအ် ပျဲပျာံဍဵုဍိုက် မပ္တံဗီုဏံ ကၠောန်ကၠုၚ်လဝ်ဂှ်ရ နဒဒှ်ဗော်ပၠန်ဂတးသၟဝ်တိ ပ္ဍဲကဵုဂြိုပ်ပယျဵုဂှ် ဒးတတ်ကၠောံလဝ် ပ္ဍဲဒေသရပ်လွဟ်တအ်ရ။ လၟုဟ်ပၠန် လုကဴပလီုပလာ်ထောံ ဂကောံပၞာန်ဏံ ဒဵုအိုတ်ဟွံမာန်တှ်ေ ဒးကလေၚ်ထပ်ဆဵုဂဗကဵု အရာဗီုဏံပၠန်ဏောၚ်။
ပ္ဍဲပၠန်ဂတးက္ညၚ် ၂၀၂၁ ဂှ် အတိုၚ်တီဒၟံၚ်ညးသ္ကအ်ဂှ်ရ ဂကောံပၞာန်သီအဝဵုဂှ် သုၚ်စောဲ နဲကဲယုတ်ပရေံ လ္တူနူကဵုအခိၚ်ကၠာတေံတုဲ သုၚ်စောဲကၠုၚ် နဲကဲပ္ဍဵုဍိုက်ဓဇန်ကြာန် လ္တူညးဍုၚ်ကွာန်၊ ဂကောံဇြဟတ်ပရေၚ်ဍုၚ်ကွာန်၊ ဂကောံဇြဟတ်ပၠန်ဂတးတအ်ဂှ်ရ ပိုဲဂှ် ဒေါံဟွံဂွံ ဒးရုဲစှ်ကၠုၚ် ဂၠံၚ်တရဴပၠန်ဂတးရပ်လွဟ် ဒှ်ကၠုၚ်ရ။ ပၠန်ဂတးဏံဂှ် ဒှ်အကာဲအရာ ဒပ်ပၞာန်ဓရိုဟ်ပလံၚ်လဝ်ရ။ ပိုဲတအ်ဂှ် အတိုၚ်နဲကဲပရေၚ်ဍုၚ်ကွာန်ရ မိက်ဂွံရေၚ်တၠုၚ်အာဍာံဍာံကီုလေဝ် ဒှ်အကာဲအရာပၠန်ဂတးရပ်လွဟ် စိုပ်ကၠုၚ်ဂတရ။ ကိစ္စဏံ ပိုဲထံက်ဂလာန်ပေၚ်ၚ်ရ။ ပၠန်ဂတးရပ်လွဟ်ပိုဲဂှ် ဒှ်ပၞာန်ဒုၚ်ဒဝ် တဝ်စၞေဟ်ဗဗွဲဓဝ်ရဂှ် အဲပတှ်ေကေတ်လဝ်ဗီုဏံရ။
အလဵုပိုဲ ၜိုန်ရကၠောန်ရေၚ်တၠုၚ် နတဲဟွံမာန်ကီုလေဝ် ဂကောံဇြဟတ်ပၠန်ဂတး ကၠောန်ရေၚ်တၠုၚ်မာန်ဒၟံၚ်တအ်ဂှ် နကဵုပိုဲ ၜိုတ်သ္ပမာန်လေဝ်။ သွက်ဂွံရီုဗၚ်ထ္ၜလဘာ်ကဵုဂှ် ဗော်ပိုဲပါမှ ဗီုဂှ်ဟွံသေၚ်ပုဟ်။ ဒှ်ကိစ္စကၠောန်ဒၟံၚ်ညးသ္ကအ်သီုဖအိုတ်ရ။ မၞိဟ်မိက်ဂွံကဵုကၟိန်ဍုၚ်ပိုဲ ၜိုဟ်လလံ ညးလဵုဟွံဟီု ကိစ္စဏံဂှ် ၜိုတ်သ္ပမာန် ပါလုပ်ရေၚ်တၠုၚ်ဒၟံၚ်ညးသ္ကအ်ဂှ်ရ ကၟိန်ဍုၚ်ပိုဲဂှ် အတိုၚ်ပိုဲမိက်ဂွံကဵုဒှ် ၜိုဟ်လလံ၊ ဗၠးၜး၊ ဗဗွဲဓဝ် ကိစ္စလဵုဟွံဟီု ပိုဲပါလုပ်အာ နူကဵုသွာၚ်ဇဳဏောၚ်။ ရီုဗၚ်အာဏောၚ်။ နူကဵုသွာၚ်ပိုဲသ္ပမာန်ဂှ် ရီုဗၚ်ကဵုအာဏောၚ်။
သြၚ်လောန်တိုၚ်မ် – သွက်ဗော်လူဗောၚ်တေတ်ဒဳမဝ်ကရေတ်တေတ် ဒတူလာၚ်ကၠုၚ် ပွိုၚ် (၃၅) သၞာံ ကာလကြေပ်ဂြတ်အိုတ်ဟီုတှ်ေ ဒှ်ကာလလဵုရော။ လ္တူဏံ သဳကၠဳထ္ၜးကဵုညိ။
ဒဝ်နှေန်နှေန်မွှေ – နူကဵုဂကောံပၞာန် ပ္တိတ်ကၠုၚ်တၚ်လလောၚ်တြး ဗော်ပရေၚ်ဍုၚ်ကွာန်ပိုဲဂှ် နူကဵုဒဒှ်ဗော်ပရေၚ်ဍုၚ်ကွာန် လုပ်သၞောဝ် ပလီုရုပ်လဝ်ရ။ ပိုဲဂှ် နူကဵု ၂၀၂၁ အခိၚ်ပၠန်ဂတးက္ညၚ် စဒှ်ကၠုၚ်တေံရ ကဵုဂကောံပၞာန်သီအဝဵုတှ်ေ နဲလဵုလေဝ် ဟွံပံၚ်တောဲပုဟ်ဟီုဂှ် ပိုဲဖျေံလဝ် တၚ်လစွံစိုတ်တုဲတုဲဒၟံၚ်ရ။ တၚ်လလောၚ်တြးလေဝ် ပ္တိတ်လဝ်ရ။ ပရေၚ်ဍေံတအ်ကော်ဘိက် သီုဖအိုတ်ဂှ် ပိုဲပါဲတးလဝ်ရ။ တၚ်ကော်ဘိက် သွက်ဂွံပါလုပ် ပ္ဍဲယန္တရာဂကောံပၞာန်ဂှ်လေဝ် ပိုဲတးပါဲလဝ်ရ။ ပရေၚ်ပံၚ်တောဲ ပါလုပ်လဝ်ဟၟဲပုဟ်။ ဒၟာနူဟၟဲဂှ်ရ ယဝ်ရပိုဲကလေၚ်ရံၚ်အာ မွဲလ္ပာ်ပၠန်တှ်ေ သွက်ပရေၚ်ဍုၚ်ကွာန် ဗီုပိုဲမိက်ဂွံကၠောန် ဂွံကၠောန်ဂွံဂှ် ဒးနွံကဵုပြယာဲနဲကဲဂၠိုၚ်ၚ်ဏောၚ်။ ၜိုန်ဂှ်လေဝ် ကဵုဂကောံပၞာန်ဍဵုဍိုက်ပျဲပျာံဒၟံၚ်ညးဍုၚ်ကွာန်ဂှ် နဲလဵုလေဝ် ပံၚ်တောဲဟွံမာန်ပုဟ်ဟီုဂှ် ပရေၚ်ဂီုကၠီုသ္ဂံၚ်ပိုဲ၊ သွက်ဂွံအာ တိုၚ်ပ္ကဴတၚ်ရန်တၟံသ္ဂံၚ်ပိုဲမာန်ဂှ် ပိုဲဒးသုၚ်စောဲနဲကဲဂၠံၚ်ဍာန်နာနာ ညံၚ်ဂွံကိတ်ညဳကဵုအကာဲအရာဂှ် ဒးကၠောန်လဝ် နွံရ။ ဂကောံဇြဟတ် ကမၠောန်ပ္ဍဲဍုၚ်တအ်နွံဏောၚ်။ လၟေၚ်ကမၠောန်ကၟိန်ဍုၚ်နာနာ ကဵုကမၠောန်ဒးဆက်စၠောံ ညးဍုၚ်ကွာန်နွံဏောၚ်။ အခိၚ်ဒးကၠောန်ရေၚ်တၠုၚ် သွက်ပၠန်ဂတးနွံဒၟံၚ်ဂှ်ရ ပ္ဍဲကဵုနဲကဲဂၠံၚ်ဍာန်ဗော် ပိုဲပိတန်ဂှ်တှ်ေ ရေၚ်တၠုၚ်ဒၟံၚ် လၟေၚ်ကမၠောန်ဗော်ပိုဲရဂှ် မိက်ဂွံဟီုဏာဗွဲခမ္ဍန်ရ။
ကာလကြေပ်ဂြတ်အိုတ်ဂှ် အခိၚ်ကလေၚ်သ္ၚဳဂၠိပ်ရံၚ်ဂှ် အခိၚ်ဟွံကြေပ်ဂြတ် ဟၟဲပုဟ် အဲညာတ်ကေတ်လဝ်ဗီုဏံရ။ မုဒှ်ရောတှ်ေ လစွံစိုတ်ဂကောံပၞာန်ဂှ် ကၠောန်ပတောံဗက်ဒၟံၚ်ဍေံ၊ ပၠန်ဂတးဒၟံၚ်ကဵုဍေံဟီုတှ်ေ ဗီုပြၚ်သဏ္ဌာန်စုၚ် ဍဵုဍိုက်ဒၟံၚ် မၞိဟ်တအ်ဏံရ။ သွက်အဝဵုဍေံ ဂွံတန်ကြန်၊ ညံၚ်ဒတုဲမြမောဝ်ဍေံတအ် ဂွံဆက်တန်တဴဴအာမာန်ဂှ် ဂကောံလဵုဟွံဟီု ဗော်ပရေၚ်ဍုၚ်ကွာန်လဵုဟွံဟီု၊ သွက်ဂွံဍဵုဍိုက်ဂှ် ဒှ်ပူဂိုလ်ဇြိုၚ်စိုတ်ဟွံသေၚ်ဂှ်ရ အခက်ခုဲပိုဲဒးဆေၚ်ဒၟံၚ်မုက် ယဝ်ဒးဟီုတှ်ေ ကာလဟီုဟွံအိုတ် နွံရ။ အလဵုပိုဲလေဝ် အခိၚ်ဒးတတ်ကၠောံကၠုၚ်လဝ် ပ္ဍဲထံၚ်နွံရ။ က္ဍိုပ်သ္ကိုပ်ဗော်တၞဟ်တအ် သ္ဂံၚ်ဗော်တၞဟ်တအ်လေဝ် မၞိဟ်ဒးပြဟ်လလုဲအာ ပ္ဍဲပရေၚ်စၟဳစၟတ်လေဝ် နွံရ။ တအ်ဏံသီုဖအိုတ် အခိၚ်လဵု ကာလလဵု ကြေပ်ဂြတ်အိုတ်ရောဟီုဂှ် ဂွံဟီုဝါတ်ဒၟံၚ်။ ဆ္ဂး ယဝ်ဒးဟီု အရာပြာကတ်အိုတ်မွဲတှ်ေ ပ္ဍဲမွဲဒမြိပ်ဒးဆေၚ်ကၠုၚ်မုက်ကဵု ဂကောံပၞာန်သီအဝဵုမွဲဒမြိပ်ဏံတှ်ေ ဂကောံပၞာန်သီအဝဵုလၟုဟ်ဏံဂှ် ဟိုတ်နူဒှ်ဒၟံၚ်ဂကောံ ကြပ်ဒှ်ဒၟံၚ်ဒမၠ ကြံဒိုဟ်၊ ဓဇန်ကြံကြ၊ စိုတ်ဓာတ်မၞိဟ်ဟၟဲ လောန်နူကဵုဂကောံပၞာန် အခိၚ်ကၠာတေံဏီဂှ်ရ သွက်ဂွံဆေၚ်မုက်ကဵုဍေံတအ် ဒးဂစာန်ပ္တိတ်ဒၟံၚ်ဇြဟ်သွာၚ်စုၚ်ရ၊ ဂၠာဲဒၟံၚ်နဲကဲဂၠံၚ်ဍာန်ရ။ ယဝ်ဒးကလေၚ်ဟီုတှ်ေ ကြေပ်ဂြတ်ကၠုၚ်ဒၟံၚ်မွဲဒမြိပ်ဂှ် ဍာံဒၟံၚ်ရ။ အခိၚ်လၟုဟ်ဏံဂှ်တှ်ေ ဒှ်အခိၚ်ကြေပ်ဂြတ်အိုတ်ရ ဟီုစဂွံဒၟံၚ်။
သြၚ်လောန်တိုၚ်မ် – အလန်လကြဴအိုတ်ဏံ သွက်ဂွံပါဲပ္တိတ်ထောံဒပ်ပၞာန် နူကဵုပရေၚ်ဍုၚ်ကွာန်ကၟိန်ဍုၚ်ဗၟာဂှ် သၞောဝ်ဥပဒေသ္ဇိုၚ်ဒက်ပ္တန် ၂၀၀၈ ၜိုတ်ဂလိုၚ်လဵု ဒှ်ဒၟံၚ်အတာဒၞာရော။ သ္ၚဳဂၠိပ်ထ္ၜးကဵုညိ။
ဒဝ်နှေန်နှေန်မွှေ – တၠုၚ်လအာကီု၊ တၠုၚ်လအာဟွံသေၚ်ကီု ဒှ်သၞောဝ်သ္ဇိုၚ်ဒက်ပ္တန်ခိုဟ်ဟ်ဟွံသေၚ်ရဂှ် ပိုဲမိက်ဂွံဟီုဗီုဏံရ။ ပ္ဍဲပေါဲရုဲမာဲ သၞာံ ၁၉၉၀ တေံ အတိုၚ်ဗော်ဒဳမဝ်ကရေဇြဳ ကော်စတှ်ေ ဂွံဇၞးလဝ်ခတက်ၜဳ ခတက်ကြုၚ်ရ။ ပ္ဍဲကဵုအကာဲအရာဏံဂှ် ဒပ်ပၞာန်ဂှ် ကၠောန်ပေါဲရုဲမာဲဗော်ဇဳတုဲတှ်ေ က္လေၚ်အာသ္ၚိဇမၠိၚ်ကောန်ပၞာန်ဏောၚ်ဟီုတုဲ ဖံက်ပ္ကဝ်ကၠုၚ်လဝ်ကတိပါၚ် ပြာကတ်တုဲဒၟံၚ်ဂှ်ရ ဍေံတအ်ကော်ကောံဓရီုကောန်ဂကူဂးတုဲ ချူဓဇက်သၞောဝ်ဥပဒေဏံရ။ ချူဓဇက်တုဲ အခိၚ်ပျးဌာန်ကၠုၚ်ဂှ် ပ္ဍဲကၟိန်ဍုၚ်ပိုဲ အတိုၚ်တီဒၟံၚ်ညးသ္ကအ်ဂှ်ရ ကျာလဗိုတ်နာဂေတ်လုပ်တုဲ ညးဍုၚ်ကွာန်ဂၠိုၚ်ကဵုကိုတ် ဒးလီုလာ်လဝ်ရ။ ဟွံပၠုပ်ညးဍုၚ်ကွာန်တအ် ပ္ဍဲစရၚ်ချိုတ်တုဲ ပၠုပ်စုတ်လဝ် ပ္ဍဲစရၚ်မၞိဟ်သှ်ေဂျိုၚ်ရ သီုကဵုညးဍုၚ်ကွာန် ချိုတ်အာတုဲတအ်ဂှ် ထံက်ဂလာန်ဂးတုဲ ပျးဌာန်ကၠုၚ်လဝ် သၞောဝ် ၂၀၀၈ ရ။ ကေတ်အခိၚ်တုဲ ချူဓဇက်လဝ်သၞောဝ် ၂၀၀၈ ဂှ် သွက်ဂွံစဵုဒၞာကဵု အဝဵုဒပ်ပၞာန်၊ ယန္တရာဒပ်ပၞာန် ညံၚ်သၞောတ်တၠအဝဵုပၞာန် ဂွံဂၠိၚ်သ္ၚောဲ ရန်လဝ်တုဲ ချူဓဇက်လဝ်ရ။ လ္တူကျာဏံတှ်ေ ညံၚ်ကဵုလဝ် အခေါၚ်အရာဒဳမဝ်ကရေဇြဳရ။ တၚ်ဂၞၚ်လ္တူကျာဂှ် နွံဒၟံၚ်ရ။ ဍေံတအ်ရ သၞောဝ်ဥပဒေဂးတုဲ ပျးဌာန်လဝ်ရ။ ပ္ဍဲကဵုကြက်ရှ်သာ်ဇေတ်တ် လ္ပာ်ပ္ဍဲတေံဂှ် ကဵုလဝ်အခေါၚ်ဒပ်ပၞာန်သီအဝဵု အခိၚ်ဟွံရုဲရလေဝ်။ ပ္ဍဲအခိၚ်လၟုဟ် နတဲဂှ်လေဝ် သၞောဝ်ဥပဒေဟီုဂှ် ရပ်ဂိုၚ်လဝ်တုဲ တၚ်ဂၞၚ်ပါဒၟံၚ်ပ္ဍဲသၞောဝ်တအ်ဂှ် ဖံက်ပ္ကဝ်တုဲ နူကဵုဒပ်ပၞာန်သီကေတ်လဝ်အဝဵုရ။ လုကဴသၞောဝ်သ္ဇိုၚ် ၂၀၀၈ နွံဒၟံၚ်ဏီ ဒပ်ပၞာန်နွံဒၟံၚ်ဏီတှ်ေ ကၟိန်ဍုၚ်ပိုဲ ဆလအ်လေဝ် ဒှ်ကၟိန်ဍုၚ်ဒဳမဝ်ကရေဇြဳမာန်ဟွံသေၚ်ပုဟ်။ ကၟိန်ဍုၚ်ပံၚ်ကောံဖေတ်ဒရေဝ်လေဝ် ဆလအ်ဒှ်ကၠုၚ်မာန်ဟွံသေၚ်ပုဟ်။ သၞောဝ်သ္ဇိုၚ် ၂၀၀၈ ဂှ် သွက်ကၟိန်ဍုၚ်ပိုဲ ဒှ်သၞအဓိက သၞောဝ်ဥပဒေစဵုဒၞာကဵုဒၟံၚ် သၞောတ်တၠအဝဵုပၞာန်ရ။ ညံၚ်အရာဏံ ရိုဟ်ကၞက်ဂွံပိုတ်သ္ကုတ်အာ ပိုဲဒးဗတိုက်ပ္တိတ် စဵုကဵုစိုပ်လအိတ်ဏောၚ်။ ညံၚ်သၞောဝ်သ္ဇိုၚ်ဒက်ပ္တန် ဖေတ်ဒရေဝ်ဒဳမဝ်ကရေဇြဳ သီုညးဖအိုတ်ပါလုပ် ချူဓဇက်လဝ် တုပ်လဝ်စိုတ်မွဲတန် ဂွံနွံကၠုၚ် ပၟိက်ဇၞော်ဒၟံၚ်ဏောၚ်ဂှ် အဲမိက်ဂွံဟီုရ။