ဒပ်ပၞာန်ရခေၚ် AA၊ ဒပ်ပၞာန်ကောန်ဂကူတအာၚ် (TNLA) ကေုာံ ဂကောံကိုဝ်က (MNDAA) မဟာမိတ်ကောဒေံပိဂကောံတအ်ဂှ် ကြဴနူလလောၚ်တြးလဝ် ပရေၚ်ချဳဒရာၚ်ပၞာန် ကဵုလဝ်ယၟု ၁၀၂၇ တုဲဂှ် ထ္ပက်ပၞာန်ဗတိုက်လဝ်ကံၚ်ဇြဳပၞာန် မၞုံပ္ဍဲတွဵုရးသေံသၟဝ်ကျာ မွဲဒမြိပ် သ္ကာတ်တ်မြဟ်ဟ်ရ။
နူဂိတုအံက်တဝ်ဗာ စၟတ်တ္ၚဲ (၂၇) လလောၚ်တြးလဝ် ပရေၚ်ချဳဒရာၚ်ပၞာန်ဂှ် စဵုကဵုစၟတ်တ္ၚဲ (၃၀) ပ္ဍဲပွိုၚ် ၄ တ္ၚဲဏံ ဗဒိုပ်ကံၚ်ဇြဳပၞာန် ဗ္ဒာဲ (၇၀)ဗဒိုပ် သီကေတ်မာန်လဝ်တုဲ ဍုၚ်လ္ၚဵုဂှ်လေဝ် ထိၚ်ဒဝ်မာန်ကၠုၚ်လဝ်ရဂှ် ဂကောံမဟာမိတ်ကောဒေံပိဂကောံတအ် ကဵုလဝ်သမ္တီ လလောၚ်တြးလဝ်ရ။ ဟိုတ်နူပရေၚ်ချဳဒရာၚ်ပၞာန်ဏံတုဲ ဒပ်ကံၚ်ဇြဳပၞာန် ခရိုဟ်စှ်ေမာန်ဟာ၊ အကာဲအရာဇီုကပိုက်ဒး ပ္ဍဲဒပ်ပၞာန်မာန်ကီု၊ ပရေၚ်ချဳဒရာၚ်ပၞာန် ၁၀၂၇ ဂှ်မုဟိုတ် ကံၚ်ဇြဳပၞာန် ဂွံဒးဂိဒၟံၚ်ရော။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ဗိုလ်ဇၞော် CDM ဒပ်ပၞာန်ကျာ ဇြေဒူအောၚ်ရ။
သြၚ်လောန်တိုၚ်မ် – ကၠာအိုတ်ဏံ ပ္ဍဲမွဲဒမြိပ်ဝၚ်ကၟိန်ဍုၚ်ဗၟာ ပရေၚ်ချဳဒရာၚ်ပၞာန် ၁၀၂၇ ဂှ် စဵုကဵုကံၚ်ဇြဳပၞာန် ဒးခရိုဟ်ဒေါံကၟိၚ်စှ်ေ အကာဲအရာပရေံပရေံ သ္ပကဵုဂိဂိမာန် ညာတ်ကေတ်ဟာ။ လ္တူဏံ သ္ၚဳဂၠိပ်ပါ်ပါဲထ္ၜးကဵုညိ။
ဗိုလ်ဇၞော်ဇြေဒူအောၚ် – ပရေၚ်ချဳဒရာၚ်ပၞာန် ၁၀၂၇ ဟီုဂှ်တှ်ေ သွက်ကံၚ်ဇြဳပၞာန်ဂှ် စဵုကဵုအကာဲအရာ ဒးဒေါံကၟိုၚ်စှ်ေအာ ဒှ်မာန်ရ။ တၚ်ပထမဂှ်တှ်ေ လဂွံကဵုဇြဟတ်လေဝ် သွက်ဂွံပလံၚ်ပ္ဍဲဒေသဂှ် ဒးသုၚ်စောဲ ဇြဟတ်နုက်ပ္တိတ် ဂၠိုၚ်ဏောၚ်။ ဇြဟတ်နုက်ပ္တိတ်လဝ် သီုဖအိုတ်ဂှ်လေဝ် အခိၚ်လၟုဟ် ဒှ်ဒပ်ဇူဒၟံၚ် ဟွံသေၚ်ပုဟ်။ လၟုဟ်ဏံ ပ္ဍဲတိဍာ်ဍေံတအ် ဒှ်ဒပ်ဗတိုက်ဒၟံၚ်ရ။ ဘဲဒဏ်ဍောၚ်ၜိုတ် ဍေံတအ်၊ ဘဲဒဏ်စိုတ်ဓာတ်လီု ဒးဒုၚ်ဒၟံၚ် ဗွဲမဂၠိုၚ်ရ။ ္ဍဲဒပ်ပၞာန်ဂှ် ယဝ်ကောန်ဍုၚ်အရၚ်တအ် ဗတိုၚ်ညးသ္ကအ် သီုဖအိုတ်တှ်ေ သွက်ဂွံထိၚ်ဒပ်ပၞာန်မာန် ဝါတ်မံၚ်ဏောၚ်ဟီုဂှ် ဇၟာပ်ကောန်ပၞာန် တီမံၚ်ညးကအ်ဖအိုတ်ရ။ ပ္ဍဲစိုတ်ဍေံတအ် ကောန်ဍုၚ်အရၚ်သီုဖအိုတ် ပါကၠုၚ်ယျဟီုတုဲ တၚ်ဒုၚ်စသိုၚ်ဗီုဏံလေဝ် စိုပ်အာဏောၚ်။ သွာၚ်စိုတ်ဓာတ်လေဝ် ယဝ်ရဟွံချိုတ် ပ္ဍဲပေါဲဗတိုတ်ဏံတှ်ေ ဒးချိုတ် ပ္ဍဲပေါဲဗတိုက်တေံဏောၚ်။ ယဝ်ရဟွံချိုတ် ပ္ဍဲပေါဲဗတိုက်လ္ပာ်တေံတှ်ေ ပေါဲဗတိုက်တၞဟ်မွဲ မၚ်ဒၟံၚ်ဏောၚ်ဟီုဂှ် ပရေၚ်ဒဒှ်ဗီုဏံ နွံဒၟံၚ် ပ္ဍဲစိုတ်ဍေံတအ်ဏောၚ် ထေၚ်ရ။ သွာၚ်စိုတ်ဓာတ်ကီု၊ သွာၚ်ဇြဟတ်ကီု စှ်ေအာ ဗွဲမဂၠိုၚ်မာန်ဏောၚ်။ နကဵုဒပ်ကံၚ်ဇြဳပၞာန်လေဝ် စဵုကဵုအကာဲအရာ ဒးဒေါံကၟိုၚ်စှ်ေအာ ဒှ်မာန်ဒၟံၚ်ရ။
သြၚ်လောန်တိုၚ်မ် – ဟိုတ်နူဇွိုန်လပှ် ပေါဲဗတိုက်ဏံတုဲ ပ္ဍဲကဵုဒပ်ပၞာန်လေဝ် ၜိုတ်ဂလိုၚ်လဵု ပရေၚ်ဇီုကပိုက် နွံကၠုၚ်မာန်ရော။ ဓဝ်ပတှ်ေ လ္တူကံၚ်ဇြဳပၞာန် ဟၟဲကၠုၚ်၊ ပရေၚ်ဂြိပ်တိတ် နူဗဒိုပ်တအ်ရော နွံကၠုၚ်မာန်ဟာ။
ဗိုလ်ဇၞော်ဇြေဒူအောၚ် – ဇွိုန်လပှ်ဏံ ဒှ်ဒၟံၚ်ဇၞော်ကဵုဇြဟတ်ဂှ် ချိုတ်ပၠိုတ်ရ။ ပ္ဍဲကဵုဒပ်ကံၚ်ဇြဳပၞာန်ဂှ်တှ်ေ နူကဵုတမ်တေံဂှ် ဓဝ်ပတှ်ေ ပ္ဍဲကံၚ်ဇြဳပၞာန် ဟၟဲပုဟ်။ အစောဲဂကောံ၊ ဟိုတ်နူဒမၠုပရေၚ်ဘာသာတအ်ရ ဒပ်ကံၚ်ဇြဳပၞာန် ဂွံဒတူလာၚ်ကၠုၚ်ဒၟံၚ် ဒဵုကဵုလၟုဟ်ရ။ ပေါဲဗတိုက်လၟုဟ်ဂှ်လေဝ် ပ္ဍဲဒၞာဲဗွဲမဂၠိုၚ် ဗတိုက်ကၠုၚ်ရ။ အခိၚ်လၟုဟ်ဏံ ဒပ်ပၞာန်ရခေၚ် အေအေဟီုတှ်ေလေဝ် ဗတိုက်ဒၟံၚ် ပ္ဍဲတွဵုရးသေံသၟဝ်ကျာ။ ပ္ဍဲကဵုဒေသညးတအ် ဟွံဂွံဗတိုက်ဏီပုဟ်။ ယဝ်ရဗတိုက် ပ္ဍဲကဵုဒေသညးတအ်ဏောၚ်လေဝ် တိဍာ်ပၞာန်ဂှ် သၠဲတိုန်ကၠုၚ်ဏောၚ်။ ဒပ်ကံၚ်ဇြဳပၞာန် သီုဖအိုတ်ဂှ် အခိၚ်လၟုဟ်ဏံ ပြးတိတ်အာဒၟံၚ် အိုတ်ယျ။ နူကဵုတမ်ဝါဒိတေံ ပ္ဍဲကဵုဒပ်ဍေံတအ်ဂှ် ကောန်ပၞာန် ဒဵုကဵုအခိၚ် ဂွံဇူဟၟဲ အခိၚ်ဒးဒုၚ်ဒၟံၚ်ဘဲဒဏ်ဍောၚ်ၜိုတ်၊ ဗလးမုက်ပၞာန်၊ ဃောကမၠောန်ယှုက်ဒၟံၚ်ကဵု အရာတအ်ဏံဂှ် လၟုဟ် ထပ်တုဲ လ္တူပြဒ္ဒညာမၞိဟ်ဇၞော်ကံၚ်ဇြဳပၞာန်တအ် အစောန်သောၚ်ကလးမာန်ဂှ် စိုတ်လီုကၠုၚ်ဏောၚ် ပိုဲညာတ်ကေတ်ရ။
ဒဵုကဵုအခိၚ်လၟုဟ်လေဝ် ယဝ်ရဍေံတအ် ဟွံသီကေတ်အဝဵုပုဟ်ဟီုတှ်ေ မုပြဒ္ဒညာလေဝ် သွက်ဂွံဒှ်ကၠုၚ် ဟၟဲပုဟ်။ လၟုဟ်ဏံ အခိၚ်သီကေတ်အဝဵုတုဲ လ္ပာ်လကြဴဏံ ပြဒ္ဒညာဒှ်ကၠုၚ် ဗွဲမဂၠိုၚ် နူကဵုဒပ် ဒးသောၚ်ကလးဒၟံၚ်ရ။ ကောန်သ္ဂံၚ်ကဆံၚ်သၟဝ်တအ်ကဵု သၞာဲဒဴဍောတ်တ်တအ်ရ ဒးဒုၚ်ဆောံလေၚ်ဒၟံၚ်။ ၃ သၞာံလေဝ် ပေၚ်ကၠုၚ်ရဏောၚ်။ လ္တူနူဏံလေဝ် အခိၚ်ဘိုအ်ဂွံလအ်နွံဒၟံၚ်ဂှ် နကဵုမၞိဟ်ပ္ဍဲဒပ်ပၞာန်ဂှ် ပေါဲဗတိုက်မၚ်မံၚ်ဂတတေံ ဗွဲမဂၠိုၚ်ဂၠေၚ်ရ။ အခိၚ်ဏံ ယဝ်ဟွံချိုတ် လကြဴတှ်ေ ချိုတ်ဏောၚ်ဟီုဂှ် တၚ်ဒုၚ်ဂိုၚ်ကေတ်ဏံ နွံကၠုၚ် ပ္ဍဲဒပ်ပၞာန်မာန်ရ။ ပေါဲဗွဲမဂၠိုၚ် အာဏောၚ်။ ပရေၚ်ဟွံပေၚ်စိုတ် လ္တူမၞိဟ်ဇၞော်တအ်လေဝ် ဒှ်ကၠုၚ် ဗွဲမဂၠိုၚ်မာန်ဏောၚ် ပတှ်ေကေတ်လဝ်ရ။
သြၚ်လောန်တိုၚ်မ် – ကံၚ်ဇြဳပၞာန်လေဝ် ပ္ဍဲကဵုတွဵုရးသေံသၟဝ်ကျာ ဒးဒုၚ်ဗတိုက်ဏောၚ် သီုဂွံလဝ်ပရိုၚ်ဖိုဟ်ဂှ် ဒးဒုၚ်ဒုၚ်ဗတိုက်လဝ် ဃောဝိုတ်မံၚ်သတိ ဗီုလၟုဟ် လ္တူပရေၚ်ဒးဒုၚ်သီဒၟံၚ်ဗဒိုပ်တအ်ဂှ် ဗီုလဵုညာတ်ကေတ်ရော။
ဗိုလ်ဇၞော်ဇြေဒူအောၚ် – တၚ်အဓိက်ဂှ် ပ္ဍဲကဵုဗဒိုပ်ကံၚ်ဇြဳပၞာန်ဂှ် ဇြဟတ် ဟၟဲရပုဟ်။ ၜိုတ်ဂလိုၚ်လဵု ဍေံတအ်ဒုၚ်ပန် ဒုၚ်ပန်ရ။ သွက်ပၞာန်ရီုဂွံကၠုၚ် လ္ပာ်လကြဴဂှ် ဒၞာဲဟၟဲရပုဟ်။ ပ္ဍဲကဵုဒၞာဲပၞာန်ရီုကၠုၚ်မာန်ဂှ်လေဝ် အခိၚ်လၟုဟ်ဏံ လုပ်ဗတိုက်ဒၟံၚ်။ စိုပ်လေဝ်စိုပ်အခိၚ် ဗက်ဂှ် ဂြိပ်တိတ်နူဒပ်ဏံတှ်ေ ဂြိပ်၊ ဟွံဂြိပ်တှ်ေ ချိုတ်ဏောၚ်။ ဂြိပ်တိတ်ဒၟံၚ်ညးသ္ကအ် အိုတ်ရ။ မၞိဟ်ဂြိပ်ဟွံမာန်ဂှ် ဒးပြဟ်လလုဲ။ ပရဟ်ဒုၚ်ဂွံလဝ်ပရိုၚ်လေဝ် ယဝ်ရဇြဟတ်ဟၟဲတှ်ေ မုသ္ပဟွံဂွံပုဟ်။ ပ္ဍဲတိဍာ်သီုဖအိုတ်ဂှ် ဗတိုက်ဗီုဏံဏောၚ်လေဝ် ဍေံတအ် ဟွံထေၚ်လဝ်ပုဟ်။ နူကဵုဒၞာဲဌာန်ဂအုပ်ပၞာန်နွံ ဗီုလာယှိုဝ်ဂှ် ပကောံလဝ်ဇြဟတ် နွံစလေပ်ရ။ သီုပ္ဍဲကဵုဒၞာဲဗီုဂှ် လုပ်ဗတိုက်လဝ်ရ။ သွက်ဂွံကဵုပၞာန်ရီု ပ္ဍဲဗဒိုပ်ကံၚ်ဇြဳပၞာန် ဍေံတအ်ဂှ် နဲလဵုလေဝ် ဒှ်ဟွံမာန်ရပုဟ်။ ဗဒိုပ်မုက်ပၞာန်တအ်လေဝ် ဒၟာနူဂှ်ရ ဂြိပ်တိတ်ဒၟံၚ် ညးသ္ကအ်ရ။ တုဲတှ်ေ ဒးကျဆောံလဝ်။ သွာၚ်စိုတ်ဓာတ်လေဝ် ပၞာန်ရီုလ္ပာ်လကြဴကၠုၚ်ဟွံမာန်ပုဟ်ဟီုဂှ် တၚ်ပတှ်ေကေတ်လဝ်၊ ဆေၚ်ကဵုစိုတ်ဓာတ်တအ် တၚ်ဒးစှ်ေဒၟံၚ်ကီု၊ ဒၟာနူဟိုတ်တအ်ဏံသီုဖအိုတ် ဒးကျလဝ်ရဂှ် ညာတ်ကေတ်ရ။