ရပ်ဂွံကောန်ကလောန်ဍုၚ်ဗၟာ အပ္ဍဲကဵုဍုၚ်သေံဂှ် ရဲထံက်ဂလာန်ဒပ်ပၞာန်တံ တြးပရိုၚ်ဗၠေတ် ရပ်ဂွံ PDF ဂမၠိုၚ်

ဒး၊ ဗၠေတ်

မ္ၚဵုရအဴ။ ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရအဴ။

တ္ၚဲဏံ ပရူပရာ ရဲထံက်ဂလာန်ဒပ်ပၞာန်တံ မတြးဒၟံၚ် “ ရပ်ဂွံ PDF ရဲဂြိပ်ဝရာန် ၁၇ တၠ ပ္ဍဲကဵုပယျဵုကျာ်ပိ−ကာန်ချနဘူရဳ” ဂှ် စၟဳတ်ကဵုအာရောၚ် မဒှ်ရ။

ပရူပရာဏံဂှ် ပ္ဍဲဂိတုအံက်တဝ်ဗာ (၁၃) တေံ ရဲထံက်ဂလာန်ဒပ်ပၞာန်ဂမၠိုၚ် မပ္တံကဵု ဟာန်ညုၚ်ဥူ၊ MRTV, MOI, Truth News တံ ချူတြးလဝ်ဝါဒ ပ္ဍဲကဵုဇာဇၞိက်ပရေၚ်မၞိဟ်ဝှေတ်ဗော်၊ ထလဳဂရာမ်ချာန်နေဝ် ကေုာံ Tiktok တံရ။

စပ်ကဵုပရူပရာ မပါလုပ် ပ္ဍဲပသ်ထ် အကံက်ပ္တောံရဲထံက်ဂလာန်ဒပ်ပၞာန်တံ မတြးဒၟံၚ်ဂှ်တုဲ နူကဵုသြၚ်လောန်တိုၚ်(မ်) စၟဳတ်စမ်ရံၚ်ဂှ် ဒဒှ်ရဒှ်ဒၟံၚ်ပရိုၚ်ဗၠေတ် တြးဝါဒမွဲဂှ် စၟဳတ်ဂွံဆဵုကေတ်ရ။

လၟေၚ်ဒဒှ်ဍာံဂှ် ဗီုဓာတ်ဏံဝွံ ဒှ်ဒၟံၚ်ဗီုကောန်ကလောန်ဆုဲပြံၚ်ဍုၚ်ဗၟာ ဟွံမွဲကဵုလိက်တၞးကၠောံဍုၚ်ဂမၠိုၚ် နူကဵုဂကောံဒပ်ဗၠာဲသၟိၚ်သေံတံ လလောၚ်ပ္တိတ်လဝ်ဂှ်တုဲ ဒှ်ကောန်ကလောန်ဆုဲပြံၚ် မလုပ်စိုပ်ကၠုၚ်လဝ် ပ္ဍဲကဵုဍုၚ်သေံ နူကဵုပယျဵုသေံဗၟာ ပယျဵုခရိုၚ်ကာန်ချနပူရဳတံ မဒှ်ရ။

ကောန်ဍုၚ်ဗၟာ ၂၀ တၠဏံဝွံ နူကဵုဍုၚ်ဗၟာ အခိၚ်လုပ်စိုပ် သၞေဟ်က္ၜၚ်ကျာၜၚ်ကံက်ဂှ် နကဵုစၟတ်တဲကၠောံဍုၚ် မတက်လဝ် တဆိပ်သေံပ္တောံဂှ် ဟိုတ်နူပ္တိတ်ကၠုၚ်ဇြဟတ် သွက်ဂွံကၠတ်လုပ် ဍုၚ်မလေဝ်ယှာဂှ်ရ ဒးဒုၚ်ရပ်ဒက်လဝ်ရောၚ်ဂှ် စၟဳတ်ဂွံဆဵုကေတ် အတိုၚ်တၚ်ထ္မံက်ထ္ၜး ဌာန်ပရိုၚ်ဗၠးၜးဂမၠိုၚ်ရ။

ကောန်ကလောန်ဍုၚ်ဗၟာ လိက်စၟတ်သမ္တီကၠောံဍုၚ်ဟွံမွဲ မၞိဟ်တြုံ ၁၆ တၠ ကဵု မၞိဟ်ဗြဴ ၄ တၠ အပံၚ်ဖအိုတ် ၂၀ တၠဂှ် ပ္ဍဲဂိတုအံက်တဝ်ဗာ ၂၉ တေံ ဒဒှ်ရဗၠာဲသၟိၚ်သံၚ်ခလာတံ ရပ်ဂွံလဝ် ပ္ဍဲကဵုဂၠံၚ် စၟတ် (၁) Chotiwittay akul နူကဵုခရိုၚ်သံၚ်ခလာ ပယျဵုသေံမလေဝ်ယှာတံဂှ်ဏောၚ်ဂှ် ဥူမိုဝ်ကျိုဝ် မဗက်ရေၚ်တၠုၚ်ကဵု ကေၚ်ကာသၟာကမၠောန် ဟီုဂးလဝ်ဂှ် စၟဳစၟတ်ဂွံဆဵုကေတ် အတိုၚ်တၚ်ထ္မံက်ထ္ၜး ဌာန်ပရိုၚ် VOA ရ။

ပရိုၚ်ကောန်ကလောန်ဆုဲပြံၚ်ဍုၚ်ဗၟာတံ ဒးဒုၚ်ရပ်ဒက်ဏံဂှ် ရပ်စပ်ကေတ် ဗီုဓာတ်စၟတ်သမ္တီ နူကဵုဌာန်ပရိုၚ်သေံတံကဵု ဌာန်ပရိုၚ်ဗၟာတံ မထ္မံက်ထ္ၜးလဝ်ဂှ်တုဲ ရဲထံက်ဂလာန်ဒပ်ပၞာန်တံ တြးလဝ်ပရိုၚ်ဗၠေတ် ညံၚ်ရဴ PDF တံ ဒးဒုၚ်ရပ်လဝ်ဂှ် စၟဳတ်ဂွံဆဵုကေတ်ရ။

ဌာန်ပရိုၚ် VOA ထ္မံက်ထ္ၜးလဝ်ဂှ်

https://shorturl.at/sxAE2

ဌာန်ပရိုၚ် Dawei Watch ထ္မံက်ထ္ၜးလဝ်ဂှ်

https://shorturl.at/anquK

ဟိုတ်နူတၚ်နၚ်တံဏံတုဲ ပရူပရာ မပါလုပ် ပ္ဍဲဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “ရပ်ဂွံ PDF ရဲဂြိပ်ဝရာန် ၁၇ တၠ ပ္ဍဲကဵုပယျဵုကျာ်ပိ−ကာန်ချနဘူရဳ” ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။

သြၚ်လောန်တိုၚ်(မ်)