ဒး၊ ဗၠေတ်
မ္ၚဵုရအဴ။ ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရအဴ။
တ္ၚဲဏံ ပရူပရာပရိုၚ် ရဲထံက်ဂလာန်ဒပ်ပၞာန်တံ မတြးဒၟံၚ် “နူကဵုတမ်ဒပ် ဒပ်ပၞာန်လဵုမှ ဖျေံလဝ်လွဟ်ဟွံမွဲတုဲ ဌာန်ပရိုၚ်လ္ၚဵုတံဂှ် ခလရ ၁၄၃ တိဍာ် (ကွမ်လုံ) ဖျေံလဝ်လွဟ်ရောၚ် ပြးပရိုၚ်ဗၠေတ် ဟွံဍာံဟွံဇေတ်” ဂှ် စၟဳတ်ကဵုအာရောၚ် မဒှ်ရ။
ပရူပရာဏံဂှ် ပ္ဍဲဂိတုနဝ်ဝေမ်ဗာ ၃ တေံ ချူတြးလဝ် ပ္ဍဲကဵု Tiktok ၊ ထလဳဂရာမ်ချာန်နေဝ်၊ ဇာဇၞိက်ပရေၚ်မၞိဟ်ဝှေတ်ဗော် ရဲထံက်ဂလာန်ဒပ်ပၞာန်ဂမၠိုၚ် မပ္တံကဵု ဟာန်ညုၚ်ဥူ၊ Kyaw Swar တံရ။
စပ်ကဵုပရူပရာ မပါလုပ် ပ္ဍဲပသ်ထ် အကံက်ပ္တောံရဲထံက်ဂလာန်ဒပ်ပၞာန်တံ မတြးဒၟံၚ်ဂှ်တုဲ နူကဵုသြၚ်လောန်တိုၚ်(မ်) စၟဳတ်စမ်ရံၚ်ဂှ် ဒဒှ်ရ ဒှ်ဒၟံၚ်ပရိုၚ်ဗၠေတ် တြးဝါဒမွဲဂှ် စၟဳတ်ဂွံဆဵုကေတ်ရ။
လၟေၚ်ဒဒှ်ဍာံဂှ် ပ္ဍဲဂိတုအံက်တဝ်ဗာ ၃၀ တေံ အလုံတမ်ဒပ်မွဲ ကောန်ဒပ်ကံၚ်ဇြဳပၞာန် ၄၀ တၠပြၚ်မၞုံ ပ္ဍဲကဵုဒပ်ခလရ−၁၄၂ ကံၚ်ဇြဳပၞာန် မၞုံဒေသကာန်မိုၚ် ပွိုၚ်ဍုၚ်(ကွမ်းလုံ) သ္ကုတ်သၟဝ်ကျာ တွဵုရးသေံတံ ဖျေံလဝ်လွဟ် ကၠုၚ်ပံၚ်တောဲလဝ် ဇရေၚ်ဂကောံကောဒေံသ္ကုတ်သၟဝ်ကျာပိဂကောံဂှ် စၟဳစၟတ်ဂွံဆဵုကေတ် အတိုၚ်တၚ်လလောၚ်တြး ဂကောံ The Kokang ရ။
ဒပ်ကံၚ်ဇြဳပၞာန် ခလရ ၁၄၃ မဖျေံလဝ်လွဟ်ဂှ်ဝွံ ဒုသ္ကိုပ်တမ်ဒပ်မွဲတၠ၊ သ္ကိုပ်ဒပ်စြေက် ၜါတၠတံပါလုပ်ဂှ် ဇြဟတ်ကောန်ပၞာန် ၄၁ တၠ မဒှ်ရ။ ညးတံဝွံ ဒဒှ်ရဖျေံလွဟ်ဏောၚ်ဂှ် ပ္ဍဲဂိတုအံက်တဝ်ဗာ ၂၈ တေံ ကဵုကၠုၚ်ပရိုၚ် ကုဂကောံမဟာမိတ်သ္ကုတ်သၟတ်ကျာတံတုဲ ပ္ဍဲဂိတုအံက်တဝ်ဗာ ၃၀ ဂှ် ဖျေံလဝ်လွဟ်လက်နက်ရောၚ် ဂလာန်ညးဒုၚ်တာလျိုၚ်လလောၚ်ပရိုၚ် ဒပ်ပၞာန်ကဝ်က (MNDAA) လဳကျာဝေန် (ကော်) ကိုဝ်ယာန်နာၚ် သှ်ကဵုလဝ် ဌာန်ပရိုၚ် RFA တုဲ ချူထ္မံက်ထ္ၜးလဝ်ဂှ် စၟဳတ်ဂွံဆဵုကေတ်ရ။
ပရိုၚ် ဂကောံ The Kokang ထ္မံက်ထ္ၜးလဝ်ဂှ်
ပရိုၚ် ဌာန်ပရိုၚ် RFA ထ္မံက်ထ္ၜးလဝ်ဂှ်
ဌာန်ပရိုၚ် Myanmar Now ထ္မံက်ထ္ၜးလဝ်ဂှ်
ဟိုတ်နူတၚ်နၚ်တံဏံတုဲ ပရူပရာ မပါလုပ် ပ္ဍဲဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “နူကဵုတမ်ဒပ် ဒပ်ပၞာန်လဵုမှ ဖျေံလဝ်လွဟ်ဟွံမွဲတုဲ ဌာန်ပရိုၚ်လ္ၚဵုတံဂှ် ခလရ ၁၄၃ တိဍာ် (ကွမ်လုံ) ဖျေံလဝ်လွဟ်ရောၚ် ပြးပရိုၚ်ဗၠေတ် ဟွံဍာံဟွံဇေတ်” ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။
သြၚ်လောန်တိုၚ်(မ်)