ရပ်စပ်ဗီု မရီုပ္တိတ်ဒၟံၚ် Non CDM တံဂှ်တုဲ ဂကောံပၠန်ဂတးတံ ရပ်ဒက်ဏာ ညးတံရောၚ်ဂှ် ကံၚ်ဇြဳပၞာန် တြးပရိုၚ်ဗၠေတ်

ဒး၊ ဗၠေတ်

မ္ၚဵုရအဴ။ ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရအဴ။

တ္ၚဲဏံ ပရူပရာ ရဲထံက်ဂလာန်ဒပ်ပၞာန်တံ မတြးဒၟံၚ် “ကောန်ပၞာန်၊ ဂၠုဲပၞာန် ကေုာံ ညးဒုၚ်ကာ Non CDM မဖျေံလဝ်လွဟ် နူကဵုတက္ကသိုလ်လွိုၚ်ကဝ်တံဂှ် ရပ်ဒက်အဓမ္မ ဂစိုတ်ဂယိုၚ်ဒၟံၚ်” ဂှ် စၟဳတ်ကဵုအာရောၚ် မဒှ်ရ။

ပရူပရာဏံဂှ် ပ္ဍဲဂိတုနဝ်ဝေမ်ဗာ ၁၅ တေံ ပ္ဍဲကဵုဇာဇၞိက်ပရေၚ်မၞိဟ်ဝှေတ်ဗော်၊ ထလဳဂရာမ်ချာန်နေဝ်၊ Tiktok တံဂှ် Kyaw Swars, ဟာန်ညုၚ်ဥူတံ တြးဒၟံၚ်ဝါဒ ချူတြးဒၟံၚ်ရ။

စပ်ကဵုပရူပရာ မပါလုပ် ပ္ဍဲပသ်ထ် အကံက်ပ္တောံရဲထံက်ဂလာန်ဒပ်ပၞာန်တံ မတြးဒၟံၚ်ဂှ်တုဲ နူကဵုသြၚ်လောန်တိုၚ်(မ်) စၟဳတ်စမ်ရံၚ်ဂှ် ဒဒှ်ရဒှ်ဒၟံၚ်ပရိုၚ်ဗၠေတ် တြးဝါဒမွဲဂှ် စၟဳတ်ဂွံဆဵုကေတ်ရ။

လၟေၚ်ဒဒှ်ဍာံဂှ် ဂကောံဒပ်ပံၚ်ကောံပၠန်ဂတးကရေၚ်ဍာဲတံ အာစိုပ်ရီုပ္တိတ်လဝ် ညးဒုၚ်ကာ Non CDM နူကဵုတက္ကသိုလ်လွိုၚ်ကဝ် ကေုာံ ဘာကွတ်စက်လွိုၚ်ကဝ် ၁၃၄ တၠ ကေုာံ ဂြောဝ်ဂတာညးတံ ၆၄ တၠ အာကၠုၚ်ဟွံဂွံ နွံဒၟံၚ်ပ္ဍဲဍုၚ်လွိုၚ်ကဝ် တွဵုရးကရေၚ်ဍာဲဂှ်ရောၚ် ပ္ဍဲဂိတုနဝ်ဝေမ်ဗာ ၁၄ တေံ ကံၚ်ဇြဳအုပ်ဓုပ်အခိၚ်ကာလအကြာ ဍုၚ်ကရေၚ်ဍာဲ IEC လလောၚ်ပ္တိတ်လဝ်ပရိုၚ်ဂှ် စၟဳတ်ဂွံဆဵုကေတ်ရ။

အကြာပေါဲဗ္တိုက်၊ အကြာလွဟ်ဇၞော်တံဂှ် ဂကောံဒပ်ပၠန်ဂတးတွဵုရးကရေၚ်ဍာဲတံကဵု ဂကောံမှာဇန် ဂကောံပရဟိတတံ အာစိုပ်ရီုပ္တိတ်လဝ် ညးဒုၚ်ကာ Non CDM သၟဝ်တဲကံၚ်ဇြဳပၞာန် မအာကၠုၚ်ဟွံဂွံ ကၟာတ်ဒးဒၟံၚ်တံ ခက်ခက်ခုဲခုဲရောၚ်ဂှ် ဥူဗညာ ညးအုပ်ကာလၟိဟ် (၂) ကံၚ်ဇြဳအုပ်ဓုပ် အခိၚ်ကာလအကြာတွဵုရးကရေၚ်ဍာဲ IEC သှ်ကဵုလဝ် ဌာန်ပရိုၚ် ကန္တာရဝဝဳတိုၚ်(မ်) ဂှ် စၟဳတ်ဂွံဆဵုကေတ်ရ။

သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန် (၃၂) တၠ ဖျေံလဝ်လွဟ် နူကဵုအရှာံဘာတက္ကသိုလ် လွိုၚ်ကဝ်တံဂှ် ထိၚ်ဒက်မၚ်မွဲလဝ်ခိုဟ်ဟ်ဂေါဝ်ဝ်တုဲ ကုညးမကလိဂွံဝပ်ဇီုကပိုက်တံဂှ်လေဝ် လွဳကဵုလဝ်ရောၚ်ဂှ် KNDF လလောၚ်ပ္တိတ်လဝ်ပရိုၚ် သီုကဵုဗီုတံဂှ် စၟဳတ်ဂွံဆဵုကေတ်ရ။

ကံၚ်ဇြဳအုပ်ဓုပ်အခိၚ်ကာလအကြာတွဵုရးကရေၚ်ဍာဲ (IEC) လလောၚ်ပ္တိတ်လဝ်ဂှ်

https://shorturl.at/aDSVW

တၚ်လလောၚ်တြး KNDF လလောၚ်ပ္တိတ်လဝ်ဂှ်

https://shorturl.at/fAOVY

ဌာန်ပရိုၚ် ကန္တာရဝတဳတိုၚ်(မ်) လလောၚ်ပ္တိတ်လဝ်ဂှ်

https://shorturl.at/iKL49

ဌာန်ပရိုၚ် VOA ထ္မံက်ပ္တိတ်လဝ်ဂှ်

https://shorturl.at/efPR7

ဟိုတ်နူတၚ်နၚ်တံဏံတုဲ ပရူပရာ မပါလုပ် ပ္ဍဲဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “ကောန်ပၞာန်၊ ဂၠုဲပၞာန် ကေုာံ ညးဒုၚ်ကာ Non CDM မဖျေံလဝ်လွဟ် နူကဵုတက္ကသိုလ်လွိုၚ်ကဝ်တံဂှ် ရပ်ဒက်အဓမ္မ ဂစိုတ်ဂယိုၚ်ဒၟံၚ်” ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။

သြၚ်လောန်တိုၚ်(မ်)