သဵု(လ်) ၊ ဂျာန္နဝါရဳ ၇
ဍုၚ်ကိုဝ်ရဳယျာသၟဝ်ကျာဝွံ ပ္ဍဲဂိတုဂျာန္နဝါရဳ ၅ တေံ ပန်စုတ်လဝ်လွဟ်ဇၞော် ပ္ဍဲတ္ကအ်ယောန်ဖျံၚ်ကိုဝ်ရဳယျာသၠုၚ်ကျာ ပလိုတ်သြၚ်ဇမ္ၚောဲညးတံ စဵုကဵုဗ္ဒါဲ ၂၀၀ ဝါဂှ် ကိုဝ်ရဳယျာသၠုၚ်ကျာ ဟီုရ။
နကဵုကောန်အရာပ် မမံၚ်ဒၟံၚ်လ္တူတ္ကအ်ဏံဂမၠိုၚ် သွက်ဂွံကေတ်လဝ်ပွစဵုဒၞါတံဂှ် ကိုဝ်ရဳယျာသၠုၚ်ကျာ စၞောန်ပ္ညုၚ်လဝ်တုဲ ကၠောန်သ္ပပ္ကတ်ပ္ကေၚ်ပရေၚ်ပၞာန် ပန်ပှော်နတဲဏံတုဲ ကလေၚ်ခၠေဝ်ပလန်ဏာလဝ်ရ။
ပ္ဍဲကဵုတ္ကအ်ယောန်ဖျံၚ်ဂှ် ဗ္ဒိုပ်ဖျေံသ္ဇိုၚ်လ္ပာ်ပၞာန်မွဲနွံတုဲ မၞိဟ်ၜိုတ် ၂၀၀ နွံတုဲ နူကဵုသြၚ်ပလိုတ် ကိုဝ်ရဳယျာသၟဝ်ကျာဂှ်မ္ဂး ဒှ်ဒၞါဲသ္ၚောဲဒၟံၚ်ညိညတုဲ ပ္ဍဲသၞာံ ၂၀၁၀ တေံဂှ်လေဝ် ဟိုတ်နူမကမ်လွဟ်ဇၞော် ကိုဝ်ရဳယျာသၟဝ်ကျာပန်ပှော်လဝ်တုဲ ပ္ဍဲတ္ကအ်ဂှ် ကောန်ပၞာန် ၂ တၠ ကေုာံ ကောန်အရာပ် ၂ တၠ ဒးချိုတ်အာလဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၅ အခိၚ်ဇိုၚ်သဝ်တ္ၚဲဂှ် သွက်ဂွံကလေၚ်ပန်ပှော် နကဵုလွဟ်ဇၞော် လ္ပာ်သၠုၚ်ကျာ ပယျဵုဗလးဍာ်ဂှ် စၞောန်လဝ် ဂကောံဒပ်မရိန် မၞုံလ္တူတ္ကအ်ပယျဵုၜါဂှ် ဌာနဝန်ဇၞော်ကာစဵုဒၞါ ကိုဝ်ရဳယျာသၠုၚ်ကျာ ဟီုရ။
ပြဝကိုဝ်ရဳယျာသၟဝ်ကျာဂှ်ဝွံ ဒှ်ပြဝဂၠါဲသၞဏောၚ်ဂှ် ကိုဝ်ရဳယျာသၠုၚ်ကျာ ဟီုလဝ်တုဲ လ္ပာ်သၟဝ်ကျာဂှ်တှ်ေ မကမ်လွဟ်ဇၞော်ညးတံ ဒတုံစှ်ေလ္ပာ်တွဵုဒၞက်ကိုဝ်ရဳယျာသၠုၚ်ကျာတံ ဟွံမွဲတုဲ ဟိုတ်နူဒတုံစှ်ေအာလဝ် ပ္ဍဲဒေသအပိုၚ်အခြာၜါဍုၚ်ဂှ်ရ အန္တရာယ်ဟွံမွဲပုဟ်ဂှ် ခၠေဝ်ပလန်လဝ်ရ။
ရုၚ်သ္ကိုပ်က္ဍိုက်ပ် ကိုဝ်ရဳယျာသၠုၚ်ကျာဂှ် ဟုတ်နူပရေၚ်ပန်ပှော် ကိုဝ်ရဳယျာသၟဝ်ကျာတုဲ လ္ပာ်အရာပ်၊ လ္ပာ်ပၞာန် ဇီုကပိုက်ကလိဂွံဝပ် ဟွံသေၚ်မ္ဂး အရာမလီုလာ်တံ ဟွံက္တဵုဒှ်လဝ်ကီုလေဝ် ပြဝဏံဝွံ ဒှ်ပြဝဘပဠဒၟံၚ် ပရေၚ်ၜိုဟ်လလမ် တ္ကအ်ကိုဝ်ရဳယျာဏောၚ်တုဲ ဒှ်ပြဝ သ္ကဵုပရေၚ်ကြံၚ်မ္ၚိုဟ်တံ သၠုၚ်တိုန်ဏောၚ်ဂှ် ဟီုလဝ်ရ။
ကိုဝ်ရဳယျာသၟဝ်ကျာ အခိၚ်ပန်ပှော်ဒၟံၚ် ကဵုလွဟ်ဇၞော်ဂှ် ညးဒေသ နူတ္ကအ်ဒေချဳယောန် ကေုာံ တ္ကအ်ဗေယာန်ယံၚ် မဒှ်တ္ကအ်ဗ္ဒါဲဗ္ဒါဲတံ ဒးအောပ်မာလဝ်အိုတ်ရ။
ပ္ဍဲကဵုဒေသအပိုၚ်အခြာပရေၚ်ပၞာန်ဟွံသေၚ် တ္ကအ်ကိုဝ်ရဳယျာဂှ် ပရေၚ်ကြံၚ်မ္ၚိုဟ်တံ ဟွံကေၚ်ဂဗမွဲလှ်ေ သၠုၚ်တိုန်ကၠုၚ်ဒၟံၚ်တုဲ ကိုဝ်ရဳယျာသၠုၚ်ကျာ ပန်ပှော်စုတ်လဝ် နကဵုလွဟ်ဇၞော် ၜိုတ် ၄၀၀ လစုတ်ဂှ် နိဿဲကေတ် မဳဒဳယျာအပ္ဍဲဍုၚ်တံတုဲ ထ္မံက်ထ္ၜးလဝ် ပ္ဍဲပရိုၚ်အေပဳရ။
Ref; Reuters